Sommaire pour 2026-04-10 de Isolezwe

NGIYAXOLISA ukuthi senginyamalale kakhulu kule ngosi ukudlulisa ilaka lami ngalokho kungishisa esifubeni ngezithinta ezemisakazo, abasakazi nokunye okweyamene nalokhu. Okwenza nginyamalale wukuthi ngisihlonipha kakhulu lesi sikhala engisiphiwa yiSolezwe, ukuphawula ngezithinta umkhakha wezokusakaza, ngakho angifisi ukuthi ngigcine icala nje uma ngizobhala kuyona, ngoba lokho kungenza ukuthi ngibhibhidle, ngisho into engathi shu. Nokho ngithe angibuye kulokhu ngoba ngifisa ukuncoma uNtobeko Khuluse noNtokozo Tshapa, abangabethuli bohlelo lwe-YouTube oluthi Podcast, Radio & Stuff, lapho bedingida khona izindaba zemisakazo babuye baxoxe nabasakazi beziteshi ezehlukene, ngibala ngisho nezingqwele esezathatha umhlalaphansi kule ndima. Okokuqala engikuthanda ngalolu hlelo wukuthi oNtobeko noNtokozo, benze into ehlukile nebengingayilindele nhlobo yokusilandela abasakazi abaziwayo futhi asebathatha umhlalaphansi kule ndima ukuzoxoxa nabo ngohambo lwabo lwezokusakaza, engibona kuwusizo kakhulu futhi kungabasiza abasakazi bamanje ngamasu okuchuma endimeni. Kule minyaka emibili benza lolu hlelo, abaluqale ngoJanuwari ngo-2024 -…

ITSHELE iNkantolo yesiFunda sasePinetown izolo, isosha elithweswe icala lokubulala inkosikazi yalo, ukuthi lalingenanhloso yokudubula umufi. UMnuz Lwanda Mxolisi Zungu ubhekene necala lokudubula abulale umkakhe uNkk Tania Zungu. Ubengene ebhokisini ukuzokwethula ubufakazi bakhe phambi kwemantshi. Utshele inkantolo ukuthi ukube wayekuhlelile ukubulala umufi, isigameko sasingeke senzeke ngendlela engahlelekile esagcina senzeke ngayo. “Ngangilele naye ubusuku bonke. Uma kungukuthi ngangizimisele ngokumbulala, ngangingamcindezela ngisho nangomcamelo ebusweni, ngimncishe umoya ngesikhathi elele,” kusho uZungu. Isigameko sokudubula senzeka emzini wabo osePinetown, ngoJanuwari 2024, ngesikhathi umamezala kamufi kanjalo nezingane bekhona ngaphakathi endlini. UZungu utshele inkantolo ukuthi yena nomkakhe babelwa. Uthe impi yashuba kakhulu ngesikhathi ematasa ebheka izicathulo zakhe zokujima, okuyilapho ezwa khona isibhamu sikhala sithi hixi. Uthe kwabe sekuba ongaphansi nongaphezulu, yena nomkakhe bebanga isibhamu sakhe. “Wabe esefa ngaleyo ndlela. Yonke into yenzeka ngokuphazima kweso, esikhathini esasingaba yimizuzwana emithathu…

UNXUSE ukuthi ulaka oludalwe yisiphithiphithi ngesicoco se-Africa Cup of Nations ka-2025, lungacekeli phansi ubumbano ebholeni lase-Afrika umengameli weCAF, uPatrice Motsepe. UMotsepe ukusho lokhu ngesikhathi evakashele eDakar, eSenegal, izolo, lapho ebe nomhlangano khona nomengameli wezwe, uBassirou Diomaye Faye nomengameli wenhlangano eyengamele ibhola eSenegal, u-Abdoulaye Fall. ISenegal yaba ngompetha ngoJanuwari, ngemuva kokunqoba iMorocco ngo 1-0 kowamanqamu ngegoli elavalelwa enethini nguPape Gueye kwi-extra time. Lokho kwenzeka ngemuva kokuthi abadlali beSenegal, bephume enkundleni ngenxa yokuthi unompempe wanika iMorocco iphenathi sekuzophela isiwombe sesibili. USadio Mane, owayengukaputeni ngalelo langa, wabalanda ozakwabo, umdlalo waqhubeka, iphenathi kaBrahim Diaz yavinjwa ngunozinti weSenegal, u-Edouard Mendy. Izinto zijike ngenyanga edlule, ngesikhathi ibhodi leCAF lokubuyekeza izinqumo limemezela ukuthi linqume ukuyiphuca isicoco iSenegal, lisinike iMorocco. Ngokwaleli bhodi, ngesikhathi abadlali beSenegal bephuma enkundleni bawuduba umdlalo, okusho ukuthi iMorocco yawunqoba ngo 3-0. ISenegal isikhethe ukuludlulisela…

IZOVULA kuGroup D namazwe ayingozi kwi-Africa Cup of Nations iqembu lakuleli lesizwe labafana lika-Under-17. Amajimbos aqhathwe neqembu elanqoba lo mqhudelwano ngo-2023, iSenegal, ompetha bango-1995 nango-1999, iGhana, ne-Algeria emcimbini obuseCairo, e-Egypt, ngoLwesithathu. Lo mqhudelwano uzobanjelwa eMorocco kusukela ngoMeyi 13 kuya kuJuni 2. Amajimbos azibekisela indawo ngesikhathi enqoba umqhudelwano wokuhlunga weCosafa owawubanjelwe eZimbabwe, ngoSepthemba, nyakenye, equmba phansi i-Angola ngo 2-1 kowamanqamu. Kwi-Afcon ka-Under-17 yakamuva, nayo eyayibanjelwe eMorocco, ngonyaka odlule, leli qembu lakuleli eliphekwa nguVela Khumalo, lakhishwa ngosokhaya ngo 3-1 kuma-quarterfinal. Lo mqhudelwano wagcina unqotshwe iyona iMorocco, idlula kwiMali ngo 4-2 sekukhahlelwa amaphenathi emdlalweni owaphela zibambene ngo 0-0. Amajimbos awakaze ayiphakamise indebe ye-Afcon. Ngo-2015, afinyelela kowamanqamu, aguqiswa yiMali ngo 2-0. Amazwe awu-10 azohamba phambili kulo mqhudelwano azozibekisela izindawo eNdebeni yoMhlaba ka-Under-17 ezobanjelwa eQatar, ngoNovemba nonyaka. Amajimbos asedlale kabili eNdebeni yoMhlaba. Kweyango-2015, eyayiseChile, aphuma…

BONGA uNkulunkulu ngokuqhubeka emvulela amathuba emkhakheni wokwethula izinhlelo uMoshe Ndiki, emuva kokuba isiteshi iMzansi Magic, simemezele ukubuya kohlelo oluthi Suxoka, oluqale izolo ngo-7 ebusuku. Lolu hlelo isizini yalo yesine eze nezinguquko, ibiyethulwa uMotlatsi Mafatshe kuphela kodwa kule sizini kuzoba nabethuli ababili. UMoshe kumanje ungumethuli wohlelo olusha oluthi Mgidi Moms, olungena ngeSonto ngo-6 ntambama, nalo lusanda kuqala kulesi siteshi. Le nsizwa yase-Eastern Cape, iveze ukuthi iyakholelwa ekutheni abantu kumele bangamdeli uNkulunkulu njengoba nayo ikholelwa ekutheni konke okuhle okwenzeka empilweni yayo, kungexa Yakhe. "Angazi nokuthi ngithini ngokuthola ithuba elifana naleli futhi ngisanda kubonakala kolunye uhlelo. Kusho lukhulu kimi ukuba yingxenye yalolu hlelo njengoba sizophenya amahlazo abantu abawenzayo becabanga ukuthi akukho okuzohlala obala ngelinye ilanga. Ngakho olunye uhlelo lolu oluzosiza abantu bakuleli ezinkingeni abafuna ukuxazululelwa zona, engicabanga ukuthi abantu bazoluthakasela kakhulu," kusho uMoshe.…

IZIHLATHI zivakashele izindlebe kubafundi bezikole ezimbili zaseLamontville, eThekwini, benikelelwa ngamapheya ezicathulo. Isolezwe lijoyine abeNdabe Dignified Funerals kanjalo nabeDurban Solid Waste behambisa lo mnikelo izolo eBhekaphambili Primary kanjalo naseGijima Primary. Kwenzeka lokhu nje, Isolezwe ligubha iminyaka engu-24 lasungulwa USihlalo weNdabe Dignified Funerals, uMnuz Ndabe Ngcobo, uthe lo mnikelo uyindlela yokubuyisela emphakathini kanjalo nokukhombisa ukuthi abafundi babalulekile. “Ngokuletha lo mnikelo, asigcini nje ngokufaka izicathulo ezinyaweni zabo kodwa sibanika ukuzethemba, isithunzi nokuziqhenya uma beshaya kancane beyongena emakilasini,” kusho uNgcobo. Uthe bahlose ukuthi benze umehluko, balethe ushintsho empilweni yengane ngayinye kancane kancane. “Ukwenza umehluko akuhlale kusho ukuthi kufanele ushintshe umhlaba wonke kanyekanye kodwa kuqala ngezenzo nje ezincane, eziletha umehluko,” kusho uNgcobo. Abafundi babonakale bekuthakasela ukunikelelwa ngezicathulo baphinde baphiwa nezinye izipho. Kuphinde kwatshalwa izihlahla nabakwa-DSW ukuqinisekisa ukuthi izikole zihlanzekile, futhi ziyanakekelwa. Lokhu kuzogqugquzela ukuthi banakekele…

UHLOSE ukuvikela abahlaba umkhosi ngenkohlakalo kuhulumeni nasemkhakheni ozimele, uMthethosivivinywa i-Protected Disclosure Bill. Okuseqhulwini kuMthethosivivinywa osezithebeni zabantu ukuze baphawule ngawo, ukuthi kumele kuvikelwe ulwazi lwalabo abahlaba umkhosi kanti odedela lolu lwazi angabekwa namacala aboshwe. Lokhu kuvezwe nguNgqongqoshe wezoBulungiswa, uNksz Mmamoloko Kubayi, izolo, ethulela lo Mthethosivivinywa abantu bakuleli. Uthe bahlose ukuvala igebe elikhona ekuvikelweni kwabaletha ubufakazi ngenkohlakalo kuleli. "Igebe elikhona lagqama ngesikhathi kuneKhomishini eyayiphenya ngokulawulwa koMbuso yidlanzana yeJaji uRaymond Zondo. Umthetho okhona manje awukwazi ukubeka amacala umuntu osuke edalule ohlabe umkhosi. Abahlaba umkhosi awukwazi nokuthi bangene ngaphansi kohlelo lokuvikela ofakazi," kusho uNksz Kubayi. Uthe umuntu odedele ulwazi angagwetshwa iminyaka engu-10 kuya ku-15, noma akhokhe inhlawulo kuya ngokuthi ubekwe liphi icala. Uthumele nomyalezo ovuthayo ezikhulwini noma kubaqashi abazoziba imibiko ethinta inkohlakalo. "Uma usuwazisiwe ngenkohlakalo, kumele wenze umnyakazo ngokushesha. Uma ungenzi lutho, uzobhekana nenkinga."…

MHOLI we-IFP, uMnuz Velenkosini Hlabisa, usephumele obala wathi akavimbile ukuthi kube nengqungquthela yokukhetha ubuholi beqembu. UHlabisa uthe okubambezele ingqungquthela wukuthi bafuna ukwenza isiqiniseko sokuthi kulandelwa yonke imigomo. Ukusho lokhu ngesikhathi enengxoxo nabamaphephandaba angaphansi kwe-Independent Media. I-IFP ilokhu yagcina ukuba nengqungquthela yokukhetha ubuholi ngo-2019. Kukuleyo ngqungquthela lapho umsunguli weqembu, Inkosi Mangosuthu Buthelezi, adlulisela khona izintambo kuHlabisa. Ingqungquthela yokukhetha ubuholi kwakufanele ibe ngo-2024 kodwa yahlehliselwa unyaka odlule, nakhona yagcina ihlehliswa. UHlabisa uthe akusilona iqiniso ukuthi benza ngamabomu ukuthi ingqungquthela ingabi khona. "Abanye bathi siyasaba ukubiza ingqunguthela ngoba sisaba ukuphuma ezikhundleni. Mina anginqabile ukuthi kube nengqungquthela, inqobo nje uma kuzolandelwa yonke imigomo." UHlabisa uthe kubalulekile ukuthi kulandelwe yonke imigomo ukuze bagweme ukuthi kube khona abantu abaphonsela inselelo ukuhlala kwengqungquthela. Ingqungquthela yokukhetha ubuholi be-IFP izokuba khona uma sekulandelwe yonke imigomo. "Asifuni kwenzeke lokhu okwenzeke…

UYISE wowesilisa waseWaterloo, eVerulam, owadutshulwa wabulawa yiphoyisa likaMasipala weTheku engenze lutho ngo-Agasti 2023, useveze ukuthi sekuzokwehla nobuthongo emuva kwesigwebo esitholwe yimantshi yesifunda. Lokhu kuza emva kokuthi ngoLwesithathu, iNkantolo yesiFunda saseThekwini, igixabeze ngeminyaka ngu-45 ebhadla ejele uMandlenkosi Gumbi (50), owayeyiphoyisa lomkhandlu ngesikhathi enza icala. Ubethweswe amacala amathathu okukhona kuwo elokubulala kanjalo namabili okuzama ukubulala. Ngosuku lwesigameko, uGumbi kuthiwa wadubula uMnuz Sanele Thembani (24) emgwaqweni u-M4 ngasePick n Pay Hyper, eDurban North. Ngokombiko wamaphoyisa, uGumbi wayeyingxenye yamaphoyisa ayenesivimbamgwaqo kule ndawo kodwa ngokwalaba ababehamba ngemoto umufi athulela kuyo, kwakunengozi yomgwaqo. Kuthiwa umnikazi we-double cab, umufi ayehleli kuyo nabanye esikhenkeni, wanquma ukujika aphindele emuva ebona ezinye izimoto zijika, zibona ingozi. Kuthiwa yilapho uGumbi adubula khona kathathu ebhekise evenini, inhlamvu yanemba uThembani. Uyise kamufi, uMnuz Mzomuhle Thembani, uthe kumjabulisile ukuthi ekugcineni umuntu owabulala indodana yakhe…

MHOLI we-EFF, uMnuz Julius Malema, ufuna iqembu lakhe linikezwe isikhundla soMphathiswa kuhulumeni waKwaZulu-Natal. UMalema uthe noma kanjani bazosithola isikhundla asifunayo uma sekuchithwe uhulumeni wokubambisana ophethe KwaZulu-Natal. Ukusho lokhu ngesikhathi ekhuluma nabezindaba izolo. I-EFF yeseka imizamo yeMKP yokuchitha uhulumeni wokubambisana ophethe isifundazwe. Isiphakamiso seMKP sokungabethembi ubuholi bukaNdunankulu, uMnuz Thami Ntuli, sachithwa ngonyaka odlule. UMalema uthe bazogcina bewuchithile uhulumeni waKwaZulu-Natal, wathi nabo bazoba yingxenye yokuphathwa kwesifundazwe uma sekuchithwe uhulumeni oholwa yi-IFP. "Sizoba nabaphathiswa KwaZulu-Natal kuhulumeni weMKP. Ungajahi, ijubane liyabulala. Siyasebenza lapha KwaZulu-Natal futhi kukhona okuzokwenzeka maduze. Uyazi ukuthi ngamahora amabili kuningi okungashintsha kwipolitiki." UMalema uthe bafuna ukuthi i-ANC ibambisane nabo neMKP. "Ilawa maqembu azophatha izwe ngomuso." UMalema uphinde wachaza kabanzi ngobudlelwano bakhe nabantu okuvela amagama abo kwikhomishini ephenya izinsolo ezenziwa uKhomishana wamaPhoyisa KwaZulu-Natal, uLieutenant General Nhlanhla Mkhwanazi. UMalema uvumile ukuthi uyazana nosomabhizinisi…

KUNGAXOLELI okukhonjiswa yiMamelodi Sundowns emidlalweni yakamuva yeBetway Premiership yikhona okungaba yisikhali saleli qembu laseChloorkop, esifihlekile njengoba selingena kuvuthondaba kwiCAF Champions League. Lona ngumbono kaMiguel Cardoso oyinhloko yabaqeqeshi kwiSundowns eyagcina ukuqukula iChampions League eminyakeni engu-10 edlule, kusekhona uPitso “Jingles” Mosimane. ISundowns ezama ukuwina isicoco seligi yaseNingizimu Afrika okwehlandla lesishiyagalolunye kulandelana, isiwine kwiligi kwaze kwaba kawu-10 ngaphandle kokuphazanyiswa wukudlala ngokulingana. Ngenxa yale fomu, iSundowns isibuyele esicongweni kwi-log futhi iyona esithishwa ngabaningi ukuthi igoduke nesicoco yize kuke kwaba nomuzwa wokuthi i-Orlando Pirates ikhombisa izimpawu zokuqina ngokwanele ukuyigudluza. Kule mpelasonto, iSundowns izoma kwiligi ibhekane nomdlalo womlenze wokuqala wowandulela owamanqamu weChampions League ne-Esperance Sportive de Tunis yaseTunisisa, ngeSonto ngo-9 ebusuku, eHammadi Agrebi Stadium, eRades. Lo mdlalo unzima ngezindlela eziningi kwiSundowns kodwa okuseqhulwini ngukuthi uCardoso uyobhekana neqembu lakhe lakudala. Kuzobe kungokwesithathu amasizini elandelana la maqembu ehlangana…

KULINDELEKE izinga eliphezulu emjahweni i-Durban International Marathon yanonyaka, kulandela ukwenyuswa kwemiklomelo ezohlonyulwa ngabagijimi abazokwenza kulo mjaho ozogijinywa ekuqaleni kwenyanga ezayo. IDurban International Marathon ehlanganisa i-ASA Marathon Championships nesezingeni le-Abbot World Marathon Majors, yethulwe ngokusemthethweni eRiverside Hotel, eThekwini, izolo. Lo mjaho waminyaka webanga lika-42.2km ohlanganisa nebanga lika-10km, nohlelwa yiNewlands Athletics Club, uzogijinywa ngoMeyi 3, eThekwini. Lo mjaho wandulela omkhulukazi weComrades Marathon webanga lika-87km ozogijinywa ngoJuni 14. Umgijimi ozodla umhlanganiso ku-42.2km uzokhala emuke no-R80 000, isibili kube u-R45 000, isithathu kube u-R20 000 kwabesilisa nabesifazane. Le miklomelo yenyukile kweyangonyaka odlule, isuka ku-R75 000 kophume phambili, u-R40 000 isibili, no-R15 000 isithathu. Naku-10km yenyusiwe njengoba ozodla umhlanganiso ezothola u-R6 000, isibili kube u-R3 500, isithathu kube u-R2 500. Yenyuke kweyangonyaka odlule isuka ku-R5 000 kophume phambili, u-R2 500 isibili, no-R1 500 isithathu. Kuphinde…