Landbouweekblad 09 June 2022

STOWWERIG! Die Neethlings van Saamstaan-boerdery buite Malmesbury in die Wes-Kaap het onlangs hul eerste plantseisoen afgehandel met dié splinternuwe John Deere 1890-lugplanter en John Deere 1910-saadkar. “Ons het in baie droë omstandighede geplant en byna geen reën gehad nie. Dit was presies soos die situasie in 2017,” sê mnr. Neels Neethling jr., wat die boerdery saam met sy pa, ook Neels, bedryf. Die Neethlings se hoofboerderybedryf is ’n melkery, maar hulle plant ook kanola, koring, hawer en wyndruiwe, asook lusern en mielies op ’n plaas by Colesberg in die Noord-Kaap. FOTO: FRANLI KRIEK…

DIE landbou- en landbouverwerking-meesterplan het oor die heel eerste hekkie gestruikel – die dokument lui “die sukses van dié plan maak staat op die volle verbintenis en aktiewe deelname van elke belanghebbende in die bedryf”. Twee prominente boereorganisasies het geweier om die plan te steun, en ’n ander boereorganisasie het dit slegs gesteun nadat hy ’n ooreenkoms met me. Thoko Didiza, minister van landbou, grondhervorming en landelike ontwikkeling, bereik het dat die plan oor tyd meer van sy eise sou akkommodeer. Arbeidsverteenwoordigers het ook nie die plan gesteun nie omdat die dokument nie ’n gedetailleerde pad vorentoe uiteensit om die behoeftes van plaaswerkers, soos behuising en ander basiese dienste, aan te pak nie. Dit spreek boekdele van die diep verdeeldheid in die landbousektor dat die plan nie ’n gul ontvangs onder boere…

‘Die manne raak angstig, daar is ’n redelik goeie oes op die lande, maar die soja begin oopspring en op die grond val.’ MNR. FRIEDL VON MALTITZ, vise-president van Vrystaat Landbou en ’n boer van Ficksburg, oor produksietoestande in die Oos-Vrystaat. Bl. 14 ‘Wie kan dit bekostig?’ ME. KOEKIE DE VILLIERS, perdeteler, oor die R30 000 wat sommige deelnemers aan die Bloemskou moes betaal om hul diere in kwarantyn te plaas weens Afrika-perdesiekte. Bl.20 ‘In die eerste vier maande van die jaar was inflasie op ’n jaargrondslag sowat 38% vir bees-afval, 11% vir bevrore hoenderstukke, en 8% vir stowe-beesvleis.’ ME. HESTER VERMEULEN van die buro vir voedsel- en landboubeleid (BFAP) oor prysinflasie vir diereproteïen wat gewild is onder armer Suid-Afrikaners. Bl. 17 ‘Ons kan nie elkeen op sy eie werk nie. Dit is noodsaaklik om ’n…

LEWENDE MUSEUMSTUK Die Vergelegen-landgoed by Somerset-Wes is nou die trotse eienaar van sewe Rau-kwaggas, ’n groep sebras wat ’n selektiewe teelproses ondergaan het om te lyk soos die suidelike vlakte-kwagga, ’n subspesie waarvan die laaste een in 1883 in die Amsterdam-dieretuin dood is. ’n Bevolking van vlakte-sebras is ingespan om die gene te verkry vir die kwaggas se kenmerkende velpatroon. Die naam Rau-kwaggas is ter nagedagtenis aan mnr. Reinhold Rau, ’n taksidermis, wat in 1987 met die projek begin het en oorlede is voordat dit voltooi is. Lees meer oor die teelprojek by www.quaggaproject.org. WAPENSEGE In ’n waterskeidingsaak het die Grondwethof beslis dat diegene wat vuurwapenlisensies nie betyds hernu het nie en daarna verbied is om ’n geldige lisensie te bekom, toegelaat moet word om ingevolge die Wet op die Beheer van Vuurwapens…

70% Teen einde Mei het Oekraïnse boere 70% van graanaanplantings afgehandel vergeleke met die ooreenstemmende tyd in 2021. Daar is 2 miljoen ha minder sonneblomme aangeplant as in 2021, 1 miljoen ha minder mielies, en 500 000 ha minder gars. Soja-aanplantings was vergelykbaar met die ooreenstemmende tyd in 2021. Tot 85% van boere se normale brandstofvoorraad het verlore gegaan sedert die Russiese inval op 24 Februarie. — Reuters; Oekraïnse regering 4 jaar ’n Voormalige sersant verbonde aan die veediefstaleenheid op Fouriesburg is einde Mei tot vier jaar tronkstraf gevonnis vir sy aandeel in die diefstal van vier beeste en ’n poging om drie gesteelde diere op ’n veiling te verkoop. Mnr. Thumelo Mzizi is in 2018 in hegtenis geneem toe hy en ’n medepligtige die diere op ’n veiling in Vanderbijlpark…

Moenie onderskat hoe ver ’n slegte idee kan trek nie, was ’n oudkollega se siniese waarneming oor die potensiële onsinnigheid van ’n napraterige, ja-broer- korporatiewe kultuur. ’n Bietjie soos die landboumeesterplan, dink ek die ander dag toe ek in een van Suid-Afrika se voorste sakepublikasies lees hoe die plan veronderstel is om ’n “hardnekkige sektor te transformeer”. Dít nou van ’n publikasie wat gewoonlik heel sinvolle kommentaar en goeie insigte lewer. Die feit van die saak is onder die huidige omstandighede, waar die prys en beskikbaar van kos wêreldwyd kommer wek, behoort ons as land diep dankbaar te wees vir ons landbousektor van wêreldgehalte wat genoeg kos vir ’n snelgroeiende stedelike bevolking kan verbou en Suid-Afrika ’n netto uitvoerder van kos hou. As dinge kwaai druk, sal ons miskien mieliepap pleks…