Landbouweekblad 21 April 2022

NOODHULP. Wingerde reg oor Frankryk is begin vandeesmaand deur lenteryp getref wat temperature in die Champagne-streek tot -9 °C laat tuimel het, berig Mail Online. Dit is die derde keer in ses jaar dat wingerde by Chablis in die noordooste van Boergondië deur erge ryp getref word. Wynmakers is volgens berigte bekommerd oor hoe dit oeste sal raak. Die voorkoms van matige weer vroeg in die jaar gevolg deur lenteryp is ongewoon en skep onsekerheid oor die oesvooruitsigte. In Yonne, in die noorde van Frankryk, is twee derdes van die oes verlede jaar deur lenteryp verwoes.…

’N STUDIE oor die ekologiese skade wat 160 lande in die afgelope 50 jaar veroorsaak het, het bevind Amerika en Europa is die grootste sondaars. Amerika was verantwoordelik vir 27% van die wêreld se oorgebruik van hulpbronne, gevolg deur die Europese Unie (Brittanje ingesluit) met 25%. Ander ryk lande, onder meer Australië, Kanada, Japan en Saoedi-Arabië, was saam vir 22% verantwoordelik. China was vir 15% verantwoordelik, maar die armer lande van die Globale Suide was saam vir net 8% van die oorgebruik verantwoordelik. Die studie se bevindinge is in die vaktydskrif Lancet Planetary Health gepubliseer. Prof. Jason Hickel van die instituut vir omgewingswetenskap en tegnologie in Barcelona, Spanje, sê hulle was geskok oor die skaal van die hoë-inkomstelande se bydrae. “As hulle nou volhoubare vlakke moet bereik, moet hulle hul hulpbrongebruik…

‘Dit is ’n skouspelagtige gemors.’ DR. MPHO MAJA, direkteur van dieregesondheid by die departement van landbou, landelike ontwikkeling en grondhervorming, oor die snelle verspreiding van bek-en-klouseer weens die onwettige vervoer van diere. Bl. 15. ‘Ons het ál die werk gedoen wat ons moes en die fluitjie geblaas, maar nou doen die owerhede niks verder aan die status nie.’ MNR. HANS TERBLANCHE, ’n Brahman-boer en veilingsagent, oor die staat se gebrek aan optrede nadat ’n veilingskraal by Onderstepoort in kwarantyn geplaas is weens onwettig vervoerde beeste uit die beheergebied in Limpopo. Bl. 14 As bek-en-klouseer nou in die Oos-Kaap uitbreek, sal ons alles moet toemaak, diere in kwarantyn plaas en veilings opskort. Dit sal ’n reuse-impak op boere hê.’ MNR. GÜNTHER PRETORIUS, bestuurder van hulpbronne en ekonomie by Agri Oos-Kaap, oor die organisasie se nuwe naspeurbaarheidstelsel.…

INDIË REDIGEER Die Indiese regering het onlangs sekere tipes genoomredigering kwytgeskeld van die streng bioveiligheidsregulasies wat op geneties gemodifiseerde organismes (GMO’s) van toepassing is. Volgens die Indiese publikasie Financial Express stel dié stap die regering in staat om riglyne vir gewasse wat met genoomredigering ontwikkel is, te publiseer. Hierdie besluit volg nadat ’n groep vooraanstaande landbouwetenskaplikes mnr. Narendra Modi, Indiese eerste minister, versoek het om goedkeuring vir genoomredigering te vergemaklik. ONAANVAARBAAR Uit 311 landbou-ondernemings wat aan ’n opname deur Agri SA oor plattelandse padtoestande deelgeneem het, het net twee nié probleme met swak paaie ondervind in die afgelope boekjaar nie. Die ondernemings moes gemiddeld sowat R200 000 elk weens swak paaie opdok, en het daarby elk ’n verlies van gemiddeld 16% in omset in die boekjaar gehad weens vervoerprobleme op die swak paaie.…

2 600 MW Mnr. Gwede Mantashe, minister van minerale hulpbronne en energie, het vroeër vandeesmaand ’n nuwe bodvenster vir die verkryging van 2 600 MW hernubare elektrisiteit van onafhanklike verskaffers aangekondig, wat Suid-Afrika se elektrisiteitsverkryging op dié manier op sowat 7 800 MW te staan sal bring. Daar is reeds geruime tyd druk op Mantashe om op dié manier kragvoorsiening te verhoog. — Business Day 641 Daar is in Maart 641 trekkers verkoop, wat 5% meer is as die 611 wat in Maart 2021 verkoop is. In die eerste drie maande van vanjaar is 1 995 trekkers verkoop, wat 15% meer is as die 1 741 wat in die ooreenstemmende tyd in 2021 verkoop is. Daar is 43 stropers verkoop, teenoor 29 in Maart 2021, wat ’n styging van 48,3% is. In die…

Landbouweekblad is onlangs deur goeie vriende in die lewendehawe-veilingsbedryf voor stok gekry oor ’n prikkel op die voorblad van 7 April. Dit lees dat “misdadige veeagente” vervolg sal word indien hulle diere sonder magtiging uit hoërisikogebiede vervoer. Terwyl die onverbiddelike sentiment agter vervolging een is wat duidelik, herhaaldelik en met reg deur die veebedryf self genoem is, het die betrokke nuusberig nie na spesifieke veeagente verwys nie. Met die beskrywing van “veeagente” wat redelik wyd getrek kan word, is die aantyging dat dit geïnterpreteer kon word as ’n verdagmakery van die hele veilingsbedryf. Dit was natuurlik nooit ons bedoeling nie. Om dan nog vriende onnodig die harnas in te jaag te midde van ’n volslae bedryfskrisis, is iets waaroor Landbouweekblad vanselfsprekend spyt is. Afslaers is uiteraard streng oor biosekerheid. Enige ernstige siekte-uitbreking kan…