Rapport 3/15/2020

Terwyl die hoeveelheid bevestigde Covid-19-gevalle in Suid-Afrika gister skerp gestyg het van 24 tot 38, glo kenners die land kan nog ’n katastrofiese uitbreking van die koronavirus-pandemie vryspring mits die lesse van elders ter wêreld ter harte geneem en dadelik toegepas word. Die land is nog in die fase van inperking, het dr. Jantjie Taljaard, hoof van infeksiesiektes by die Tygerberg-hospitaal in Kaapstad, Vrydag aan Netwerk24 gesê. Dit beteken dat daar nog min genoeg individuele gevalle is dat opsporingspanne mense met wie hulle kontak gehad het, kan soek en hulle kan vra om in kwarantyn te gaan. Hy sê die land ondervind nog nie ’n uitbreking waar die siekte so vinnig versprei dat dit nie meer moontlik is om mense op te spoor wat kontak met die siekes gehad het nie. Die land…

Moenie oorsee reis tensy dit “absoluut noodsaaklik” is nie, sê Christelle Colman, versekeringskenner by Old Mutual Insure. “Covid-19 kan nie meer as onvoorsien geklassifiseer word nie. Ons doen ’n beroep op mense om mooi te dink oor hul oorsese reise en nie net aan die finansiele implikasies en verliese te dink nie, maar ook oor hul persoonlike veiligheid, die impak van hul terugkeer na Suid-Afrika en die samelewing in die algemeen. Ons versoek reisigers om sulke reise ernstig te heroorweeg.” Mareli Louw (49), ’n toeroperateur van Christine van Wyk-toere in Pretoria, sê die koronavirus en inligting wat op sosiale media versprei word, is ’n groot uitdaging vir die toerismebedryf. “Ons gaan báie geld verloor. Ons vrees dit kan ons familie-onderneming kelder.” Jaco Robbertse, besturende direkteur van Ulysses Toere en Safaris in Centurion, sê…

Covid-19 kan gestop word – maar tot dusver het bitter min lande dit reggekry. China, waar die virus die eerste keer in Desember kop uitgesteek het, het die byna ondenkbare reggekry en die opmars van die siekte gestuit – die groot grafika in vandag se koerant wys daar is feitlik geen nu-we gevalle aangemeld sedert Rapport verlede Sondag verskyn het nie. Dié prestasie is slegs bereik danksy ongekende ingryping by gewone Chinese mense se lewens deur ’n totalitêre staat wat sy mense op maniere kan hiet en gebied wat in bitter min ander lande moontlik is. Die pandemie is dus nou, soos Rapport laas Sondag geskryf het, ’n Europese krisis eerder as ’n Chinese krisis, want verreweg die grootste stygings in nuwe infeksies is die afgelope week aangemeld in lidlande van die…

Te midde van groot verdeeldheid in die regerende party oor adv. Busisiwe Mkhwebane, het minstens twee ANC-swaargewigte die afgelope week laat blyk sy behoort nie meer die pos van openbare beskermer (OB) te beklee nie. Tito Mboweni, minister van finansies, het ná haar jongste bloedneus in die hof getwiet “in ’n demokrasie soos ons s’n” behoort Mkhwebane op haar swaard te val. Dr. Zamani Saul, Noord-Kaapse premier, het getwiet: “Die feitelike en regsfoute in haar verslae ontbloot haar. Haar kantoor is naak geskeur. Laat ons wag op die appèl.” Ondersteuners van oudpres. Jacob Zuma, onder andere Supra Mahumapelo, voormalige Noordwes-premier, het weer aangedui dié party behoort die OB te steun. Mkhwebane het Dinsdag in die hooggeregshof in Pretoria vir die soveelste keer pak gekry toe haar verslag oor pres. Cyril Ramaphosa se CR17-veldtogfonds as…

Die geskiedenis van die Afrikaanse taal is verdelend, sê prof. Hein Willemse, Afrikaans-dosent by die Universiteit van Pretoria. “Aan die een kant lei dit nog tot vervreemding en manifesteer dit in die huidige opset, maar aan die teen-pool is daar groeilote en gaan ons vorentoe.” “Dis ’n mite dat Afrikaans vir die Afrikaner is.” Willemse het deelgeneem aan die DAK Netwerk-gespreksessie by die Woordfees op Stellenbosch. Die temas was waarheid en versoening oor Afrikaans en vergifnis. Volgens Max du Preez, redakteur van Vrye Weekblad, is Afrikaans in die verlede gesien as “die boere se taal”. “Wie’s die nuwe stukrag (vir die taal)? Dis (die skrywers) Anastasia de Vries, Bettina Wyngaard, Ronelda Kamfer – nie Snotkop wat ‘bokkie-bokkie’ of ‘liefie-liefie’ sing nie. Dis ook die rymkletsers van die Kaap. Ons moet (weet) waar ons vandaan…

AfriForum gaan die wêreld se grootste konserwatiewe politieke konferensie na Suid-Afrika bring. Ernst Roets, dié burgerregteorganisasie se hoof van beleid en aksie, en Monique Taute, veldtogbestuurder, het die Conservative Political Action Conference (CPAC) in National Harbor in die VSA vroeër vandeesmaand bygewoon. CPAC is ’n jaarlikse politieke konferensie waarheen konserwatiewe aktiviste en afgevaardigdes van oor die VSA heen en elders ter wêreld gaan. Die Amerikaanse Konserwatiewe Unie (ACU) bied dit aan. Pres. Donald Trump, sy visepresident, Mike Pence, en die Amerikaanse minister van buitelandse sake, Mike Pompeo, was vanjaar gassprekers daar. Roets sê die organiseerders van die CPAC wil nou soortgelyke konferensies oor die wêreld heen aanbied en AfriForum is gevra om die eerste een in Suid-Afrika te reël. “Ons het opleiding by die konferensie gekry oor hoe om ’n CPAC aan te bied,…