Weg! Platteland Somer 2020

Sedert die geboorte van Platteland was die gedagte om Suid-Afrikaanse dorpies en hulle merkwaardige mense vir die wêreld te wys. Dis plekke wat ons goed ken: Dalk het jy iewers op ’n gehug met net’n winkeltjie en’n hoenderhaan grootgeword – of jy ken iemand daar óf gaan kuier soms daar. Hoe ook al, dit roer’n hartsnaar: Kyk maar hoe reageer ons as ons ’n skildery sien van die Rosendalse kunstenaar Willem Pretorius. Ons praat nie van koekblikmooi pronkperdjies wat net weet hoe om die beste voetjie voor te sit terwyl die duiwel onder ronddraai nie; maar ’n plek wat darem nou ook nie steier soos die rand ná ’n Jacob Zuma-kabinetskommeling nie. Die dorpe en mense wat ons teëgekom het vir die 25 uitgawes tot op datum, het ons stoutste verwagtinge oortref. Toe,…

Dit móés net ’n skildery word My dogter, Eileen Matthee, is ’n gr. 8-leerling aan die Hoërskool Witteberg op Bethlehem. Sy neem sedert 5-jarige ouderdom kunsklasse by die plaaslike kunstenaar Lynette Schuld, wat ’n ongelooflike pad saam met haar gestap het en haar liefde vir teken en skilder gevestig het. Sy het haar ook blootgestel aan verskillende mediums en tegnieke en haar talent uitgebou. Eileen was só geïnspireer deur die voorblad van julle Lente 2018-uitgawe dat sy ’n skildery daarvan gemaak het. Die spesifieke voorblad het ons hele gesin se oog gevang en dít, tesame met Eileen se groot liefde vir diere, het dit ’n beeld gemaak wat net eenvoudig geskilder móés word. Boonop het sy op die Eisteddfod ’n A++ met meriete ontvang vir die skildery. Hou asseblief aan om sulke inspirerende…

Ek het op hierdie nes in my tuin afgekom en sal so bly wees as een van julle kenners dit kan identifiseer. Ek raai die bouer hier was ’n spinnekop. Ek is mal oor julle tydskrif. Margaret Couper PLETTENBERGBAAI Esther van der Westhuizen van The Animal Sanctuary @Butterfly World antwoord Dit is die eierkokon van die reënspinnekop (Familie Sparassidae, spesie Palystes). Dit is ’n algemene spinnekop wat baie in huise en tuine voorkom – sy is groot en daarom skrik mense vir haar. Sy is egter baie bang vir ander diere, want sy kan nie goed sien nie en enigiets groter as sy word as ’n roofdier beskou. Hulle kan spring, maar net om weg te kom van die “gevaar” – die mens. En dan skrik jy nóg groter. Die eierpakkie word versigtig met…

Beste Johann en Irma Coetzee van Henley-on-Klip. Ek is seker julle is hoogs in julle noppies dat julle brief aan die redakteurs in die jongste Platteland geplaas is. Dis ’n groot prestasie, en ek is regtig jammer dat julle so dikwels tot trane gedryf is. Hopelik het julle genoeg snesies in die kar gehad. Ek is ’n oud-Johannesburger en nou trotse Richmond-inkommer, en my ouers woon in die DA-beheerde Midvaal-munisipaliteit. Daarom ken ek julle kwasi-Engelseplattelanddorpie goed. Vergeleke met waar julle woon, moet die Karoo en sy dorpies ’n taamlike skok wees: Geen gemanikuurde groen sypaadjies nie, geen fraai huise met gesinne wat geld maak soos bossies nie, en, behoede ons, ’n township met HOP-huise. Julle sien, buiten dat ons midde-in een van die ergste droogtes in menseheugenis is, het die meeste van…

Kampioenboom, kampioenkos Toe Ina Paarman in 2006 haar moderne toetskombuis in Constantia in die Kaap laat bou het, het sy die bouers die dood voor oë gesweer indien enige van die majestueuse ou bome op die eiendom in Hoofweg seerkry of vrek. So ernstig was die Paarmans oor die saak dat “boete-etikette” van tussen R100 000 en R1 miljoen om die belangrikste bejaarde knewels se stam vasgemaak is. Een van dié bome, ’n kurkeik (Quercus suber), hoeka die een wat die vet R1 miljoen-etiket gekry het, is intussen tot’n Suid-Afrikaanse kampioenboom verklaar. En dít het Platteland eers uitgevind toe ons by Marietjie Coetzee op Albertinia gaan kuier en’n volledige lys met al die kampioenbome in die land kry. (Lees meer oor die kampioenboomprojek en Marietjie se lieflike wildevy op bl. 38.) Die kurkeik…

Hier by Platteland is ons in die wolke oor’n gratis praktiese gids wat pas deur die Wêreldnatuurfonds van Suid-Afrika (WWF) bekend gestel is en wat jou alles en nog wat sal leer om ’n gemeenskapsbestuurde kwekery te begin. ’n Praktiese gids vir gemeenskapsbestuurde kwekerye: Kweek inheemse plante vir hervestiging bied nie net’n oorsig oor die vaardighede en spesialiskennis wat nodig is om só’n taamlik arbeidsintensiewe kwekery te bestuur nie, maar sal jou ook help om die tien basiese beginsels van kweking onder die knie te kry. Die menigte volkleurfoto’s wys presies hoe ’n mens inheemse plante saai of met steggies kan kweek. Die hoofdoel met dié gemeenskapsbestuurderde kwekerye is om werk in plattelandse gebiede te skep en inheemse plante te hervestig op stukke grond waar uitheemse indringerplante uitgeroei is. Jy kan die gids…