Table of contents for 2026-04-21 in Isolezwe

ABOMZANSI Magic, sebeveze ukuthi ayikho enye indlela obekumele baqhubeke ngayo ukuxhasa amaciko, ngaphandle kokuthi benze imidlalo emincane ezokhonjiswa kulesi siteshi. Bakusho lokhu bethula imidlalo eyishumi, ezoqala ngenyanga ezayo ukukhonjiswa kulesi siteshi, njengoba kusanda kuphela imidlalo emikhulu emibili. UShirley Adonisi, uthe ngale midlalo baqinisekisile ukuthi iqoshwa yizinkampani zentsha futhi kuyo kulingisa intsha esizakhele igama ekulingiseni nenye esanda kufika. Yonke le midlalo uthe izokhonjiswa amasonto ayishumi, kusuka ngoMeyi 11 kuze kube uJulayi. "Sethula le midlalo ngenjabulo enkulu njengoba njengesiteshi sisanda kwethula izinhlelo ezimbili, abantu abakhombisa ukuzijabulela okuwuhlelo oluthi, The Makhene’s noluthi Mgidi Moms. “Kusanda kubuya nomdlalo abantu abawujabulela othi, Isithembu SikaMsongelwa esingangabazi ukuthi isizini yesibili nayo izokwenza kahle njengeyokuqala. “Siyabonga kuzona zonke izinkampani ezibambisene nathi kuze kube manje njengoba imidlalo sesiyethula. Asingabazi ukuthi ikusasa lazo liyakhanya kulo mkhakha, ngelinye ilanga siyozibona sezisenzela…

USHAYA amakhala umndeni wowesifazane okuthiwa ugwazwe wabulawa ngesihluku kanye nendodana yakhe eNgwelezane, eMpangeni. Kulesi sigameko esenzeke ngoLwesine olwedlule, kushone uNkk Thuli Khumalo (56) nengane yakhe yomfana uMbuso Khumalo (13). Kuthiwa izidumbu zabo zitholwe ekhaya, zinamanxeba okugwazwa emzimbeni. Ngokusho kwesihlobo esicele ukungadalulwa, umndeni kawuyizwa kahle eyokubulawa kwabo “yisigebengu”. Sitshele Isolezwe ukuthi esinye isihlobo esisondelene nomufi, sitshele umndeni ukuthi isigameko senzeke sikhona naso ekhaya. Kuthiwa sithe sona besicashile ngesikhathi isigebengu sigwaza sibulala owesifazane nendodana yakhe. “Okudidayo wukuthi esitatimendeni asibhalise emaphoyiseni, uguqukile kulokhu akusho emndenini, wathi ufike isigameko sesenzekile kodwa umbonile umsolwa kancane,” kusho isihlobo. Elanda ngalokhu okuthiwa isihlobo sikutshele amaphoyisa, umthombo uthe siwatshele ukuthi sifike ekhaya sibuya emsebenzini, saqaphela ukuthi akukhanyisiwe endlini kodwa kuvuliwe. “Uveze ukuthi uthe esengaphakathi wabona isithunzi sithi shazi, wazitshela ukuthi uMbuso. Uthe uhambe wayokhanyisa ngasekhishini, lapho abone khona…

MHLELI: Ngibonga ithuba lokudlulisa ukukhathazeka ngempatho yasezibhedlela. Ngike ngagula ngikhishwa yisisu kwaze kwaphoqeleka ukuba ngibize i-ambhulensi eyangithatha yangisa esibhedlela eWentworth. Ngafika ngabo 10 ekuseni ngangafakwa i-drip ngahlala ngaze ngabonwa udokotela ngo-5 ntambama. Bangithatha igazi nendle bathi angilinde imiphumela. Ngalinda kwaze kwashaya u-12 ebusuku bangitshela ukuthi ababoni lutho ngingagoduka. Ngahlala ezitulweni kwaze kwasa ngagoduka. Kwadlula usuku ngimpintshekile ngaphinde ngabiza i-ambhulensi bangibuyisela khona. Kulokho ngafika ngo-10 ebusuku ngahlala kwaze kwasa ngingabonwangwa. Kuthe uma kusa ababengena bangitshela ukuthi angiye emtholampilo wakhona ngoba ngeke ngisizakale ngoba kugcwele. Ngizihudula ngaya khona ngahlala kwaze kwashaya u-11 emini ngingasizakele. Kwala ngisho sengikhala ngokuthi ngilale khona futhi ngiyagula bathi phela bengise-Emergency hhayi kubona. Ngagcina ngifonela owafonelwa yiPRO yakhona okunguNksz Phiri, wangibizela ehhovisi lakhe wathumela enye intombazane ukuthi ingihambise e-Emergency kudokotela. Ngempela ngafika…

UMHOLI weMKP, uMnuz Jacob Zuma, ufuna kuhlehliswe ukhetho lohulumeni basekhaya oluzayo. UZuma ufuna ukhetho okufanele lube phakathi kukaNovemba noJanuwari, lubanjwe uma sekuxazululwe isikhalo esafakwa yiMKP mayelana nemiphumela yokhetho lukazwelonke nezifundazwe lwango-2024. Ukusho lokhu ngesikhathi ekhuluma namalungu eMKP ngeSonto ebusuku emhlanganweni obuhanjelwe yizinhlaka zeqembu esifundeni iTheku. IMKP yaphonsela inselelo imiphumela yokhetho lwango-2024, lapho yaba yiqembu lesithathu ngobukhulu ePhalamende. Inhlangano eyengamele ukhetho, i-Independent Electoral Commission (IEC), yazichitha izikhalo zeMKP. Icala elafakwa iMKP kulindeleke ukuthi liqulwe eNkantolo yezoKhetho ngenyanga ezayo. UZuma uthe ukugijimela ukuba nolunye ukhetho ekubeni singakaphumi isinqumo ecaleni abalifakile kuzokwenza ukuthi abantu bangayithembi imiphumela yokhetho. Unxuse amalungu eqembu ukuba asho ngazwi linye ukuthi aluhlehliswe ukhetho oluzayo. "Kufanele sibatshele ukuthi sifuna ukwazi ukuthi ashonaphi amavoti ethu antshontshwa okhethweni olwedlule. Asibatshele ukuthi asifuni ukuthi kube khona olunye ukhetho ngoba kunezinkinga abangakazixazululi." Umhlangano wangeSonto…

SEKUNTWELA ezansi ngokululama kwesiqongqwane sasemuva kwiKaizer Chiefs, uRushwin Dortley, osekuyophela isizini singadlali kusukela salimala edolweni ngasekupheleni kwesizini edlule. UDortley (23) iqembu eselike labika ukuthi uhlinzwe ngempumelelo edolweni, bekunethemba lokuthi kungaphela le sizini esedlala. Ngemuva komdlalo wangoMgqibelo weBetway Premiership iChiefs ewudlale ngokulingana ngo 0-0 nePolokwane City, umqeqeshi uCedric Kaze, uveze ukuthi lo mdlali uDortley useqalile ukulithinta ibhola. “Ngesonto eledlule uqalile ukuthinta ibhola ngakho nginesiqiniseko sokuthi akusekude abuye,” kusho uKaze ebuzwa ngabezindaba ngokululama kukaDortley. Lo mqeqeshi ube esechaza ngokunika ithuba lokudlala uReeve Frosler naye ongumdlali wasemuva ohlangothini lwesokudla, osanda kubuya ekulimaleni obesekumhlalise isikhathi eside. UFrosler owayegcine ukudlala ngo-Okthoba nyakenye, ubonakale okokuqala kule sizini edlubhe ijezi laMakhosi eguqisa iMagesi FC ngo 4-1 ngoLwesithathu olwedlule, esuka ebhentshini ngesiwombe sesibili. Nasemdlalweni wangoMgqibelo nePolokwane, uFrosler ungene sekusele imizuzu embalwa kuphele umdlalo, engena endaweni kaThabiso Monyane. “Ubelimele…

NAKUBA iqembu lakuleli liluqale ngempumelelo uchungechunge lwemidlalo yeT20 ne-India, liyinqoba yomibili imidlalo eliyidlalile , lisazimisele ngokukhuphula izinga emidlalweni ezayo. Lokhu kushiwo ngomunye wabadlali abagqamile emdlalweni wesibili ngesikhathi liqumba phansi i-India ngamawikhethi ayisishiyagalombili eHollywoodbets Kingsmead Stadium ngeSonto. Kulo mdlalo i-India ibhethe kuqala yahlanganisa ama-run angu-147. Abashwibi bakuleli abahambe phambili kube nguChloe Tryon noTumi Sekhukhune, abathathe amawikhethhi amathathu ngamunye. AmaProteas afinyelele kuma-run angu-148 nge-over ka-18 kusaphume abadlali ababili. Kwababhethayo bekubhoka ukaputeni uLaura Wolvaardt, oshaye ama-run angu-54 emabholeni angu-34 noLuus othole ama-run angu 57 emabholeni angu-47. Ukukhonya kweqembu lakuleli eThekwini kusho ukuthi lizongena emdlalweni wesithathu ozodlalelwa eWanderers Stadium, eGoli, kusasa ngo-6 ntambama lihamba phambili ngo 2-0 kulolu chungechunge lwemidlalo emihlanu. Umdlalo wesine nawo uzodlalelwa eGoli ngoMgqibelo, bese kuvalwa ngowesihlanu eBenoni ngoMsombuluko. “Siyazi kungenzeka kube nemvula eGoli, ngakho-ke kungenzeka noma yini emdlalweni wangoLwesithathu. Kungenzeka…

UVELA ukuthi zishayana ngamakhanda izikhulu zeSABC nesiteshi iMetro FM, ngokugqoza kokudayiswa kwamathikithi alo mcimbi okulindeleke ukuthi ube se-ICC, eThekwini ngoMgqibelo. Umcimbi amaMetro FM Awards, ukhuze ibuya kulo nyaka ngemuva kwesikhathi eside agcina, njengoba lo mcimbi uke wamiswa iminyaka. Umthombo weSolezwe oyingxenye yethimba elihlela umcimbi, uveze ukuthi abakhangisa umcimbi bezwakalise ukukhathazeka kuqala njengoba abantu bebebonakala bewuthakasela umcimbi uma ufakwe ezinkundleni zokuxhumana, okulethe ithemba kusaqalwa. "Kodwa izinto zishintshe sekubhekwa indlela amathikithi ahamba ngayo eTicketpro lapho edayiswa khona, kwacaca ukuthi athengwa kancane okuyinto ebingalindelekile," kusho umthombo. Omunye umthombo uveze ukuthi izikhulu eziphezulu zalo mcimbi zishayana ngamakhanda manje ukubheka enye indlela yokuthi abantu bathenge amathikithi. "Manje kusetshenziswana nemisakazo emikhulu namaphepha eThekwini, ukuthi bakhangise umcimbi njengoba befuna ube sezingeni, kodwa kuyala njengoba manje sisesontweni lokugcina lalo mcimbi. Sekuthenjwe ukuthi ngoLwesihlanu, abanye abantu bazobe beholile…

UNIKWE isigwebo seminyaka engu-46 ebhadla ejele, owesilisa olahlwe yicala lokudlwengula nokubulala owesifazane esigamekweni esenzeka ngoDisemba 2023. UNkosinathi Ndala (41), waboshwa nabangani bakhe abathathu okunguSphamandla Mkhulise (24), Thulani Bhengu (24) noTalent Mbongeni Ntanzi (21). Babesolwa ngokubulala uNksz Nonhlakanipho Buthelezi (23), okuthiwa bamthatha ephuma endaweni yokuzijuxuza eseChesterville, iClassic Lifestyle. Kuthiwa bacela ukumgibelisa emotweni ukuze bamyise ekhaya yena nomngani wakhe. Imoto eyayinalaba kuthiwa yathubeleza njalo yangabagodukisa umufi nomngani wakhe, yaze yama kuN2 emgwaqweni obheke KwaDukuza, okuyilapho umufi nomngani wakhe kuthiwa bashaywa base beyadlwengulwa. Umngani kamufi waphulukundlela wabaleka, wasinda kanjalo. Umufi owayehlala eManzimtoti, kuthiwa kwathi sebeqede ukumdlwengulwa, bathatha isidumbu sakhe basiphonsa ngaphansi kwebhuloho. Waze watholakala ngakusasa ngemuva kokuba umngani wakhe ekhombise amaphoyisa indawo yesigameko. Ngaphambilini bake bafaka isicelo sebheyili kodwa inkantolo yabachitha. Ngokuhamba kwesikhathi laba abanye abasolwa, balivuma icala bachaza konke okwenzeka, inkantolo yanquma…

MHLELI: Impela, umuntu uyofa ezilanda ngezinhlobonhlobo zamasonto aseke wawabona kulezi zinsuku kubandakanya ayedlisa abantu utshani, ethi abakhipha amadimoni. Muva nje, sekuvumbuke "Isizwe sabaFundi bakaJesu" KwaMaphumulo. Amalungu alesi sizwe adele imisebenzi, amabhizinisi awo, imindeni yawo nakho konke ongakucabanga, ayohlala ekhaya labaFundi bakaJesu. Lesi sizwe esingasazihlanganisi nakho konke okomhlaba, siholwa uMfu Vusumuzi Sibiya. Ngicabanga ukuthi miningi imibuzo ebuzwa abantu abaningi ngaleli bandla, enjengokuthi uma umuntu eshona ungcwatshwaphi? Uma engcwatshwa khona ekhaya labaFundi bakaJesu, abomndeni bavumelekile yini ukuyomngcwaba? Bona omakhelwane balesi sizwe, bavumelekile yini uma bengakhonzi khona? Uma kunemicimbi noma kushoniwe emindeni yamalungu alesi sizwe, kuvumelekile yini ukuyohlanganyela nawo? Engingakuthandanga ukuthi kuyogxambukela uNkk Thoko Xaluva noNkk Nomagugu Mngadi beyolwa nalesi sizwe ngezizathu abazibekayo. Engani kuthiwa leli yizwe lenkululeko namalungelo, nxa bezikhethela indlela yabo yokudumusa, bona baxakwe yini? Abalimazi yini ilungelo lalaba bazalwane? Kukusigaba…

SILULELWE inyanga ezayo esokuphawula ngemigomo ethinta isifundo somlando, iHistory ezikoleni zakuleli. Bekumele kuvalwe ngeSonto ukuphawula ngemigomo ethinta lesi sifundo kodwa uNgqongqoshe weMfundo eyisiSekelo, uNksz Siviwe Gwarube, walula isikhathi. Umnyango ufuna abantu baphawule ngemigomo kulesi sifundo, kusuka kuGrade 4 kuya kuGrade 12. Okhulumela umnyango, uMnuz Terence Khala, uthe silulwe ngezinsuku ezingu-30, isikhathi sokuthi umphakathi uphawule ngemigomo. "Manje sekuzovalwa ngoMeyi 19, 2026 ukwamukela ukuphawula komphakathi ngemigomo. Lokhu sikwenze emuva kokuba bebebaningi, abasafuna ithuba lokuphawula," usho kanje. Ugqugquzele abasafuna ukuphawula ukuthi bakwenze lokhu ngokushesha. "Siwumnyango sifuna ukuthi lesi sifundo sifundise abafundi ukucabanga ngendlela ehlukile, baphinde bafundiswe ngomlando wezwe." Inyunyana yothisha iSadtu, ifuna ukuthi kugxilwe ekufundiseni ngomlando wase-Afrika. Le nyunyana isamile ekutheni ifuna lesi sifundo sibe yimpoqo kubona bonke abafundi. UNobhala Jikelele weSadtu, uDkt Mugwena Maluleke, uthe bebelokhu besho ukuthi bafuna kugxilwe ekufundiseni ngomlando…

UKONGIWA kwakamuva komgadli we-Orlando Pirates, u-Evidence Makgopa, kungenzeka ukuthi kuncikene nokuthi leli qembu lizama ukumsiza azifake emlandweni webhola laseNingizimu Afrika wokuba ngumdlali wesithathu ukushaya igoli kowabakhaya neKaizer Chiefs amahlandla amane kulandelana. IChiefs nePirates bazodudulana emdlalweni wabakhaya omqoka ngezindlela ezahlukene kubona bobabili ngaphansi kweBetway Premiership ngeSonto ngo-3 ntambama, e-FNB Stadium, eNasrec. UMakgopa oyisithandwa sabalandeli bePirates akajwayele ukuqala imidlalo kule sizini kwazise umqeqeshi wayo, u-Abdeslam Ouaddou, akakufihli ukuthi ukholelwa kuYanela Mbuthuma. Emdlalweni odlule wePirates lapho inenebule khona AmaZulu FC ngo 3-0, ukhishiwe uMbuthuma owayevule inkundla ngegoli, kwangena uBoitumelo Radiopane obese enesikhathi engadlali ngenxa yokulimala. Ubuziwe emuva komdlalo u-Ouaddou ukuthi ukwenza ngabomvu yini ukushiya ngaphandle uMakgopa wase eveza ukuthi ubengekho fithi ngokugcwele kulezi zinsuku. “Sekusele kancane ukuthi uMakgopa afike ezingeni lokuthi usengaqala umdlalo aze awuqede njengoba elulama ekuthintekeni,” kusho u-Ouaddou. “Ungumdlali wethu omqoka…

ZITHINTE abaningi emkhakheni wokulingisa izindaba zokudlula emhlabeni kwenkakha, uCynthia Shange. Izindaba zokushona kwakhe zivezwe yindodakazi yakhe uNonhle Thema ezinkundleni zokuxhumana. UCynthia waba ngowokuqala ukumela elakuleli emcimbini kazime kaMiss World. Akagcinanga lapho wabuye wazakhela igama emkhakheni wokulingisa emdlalweni uShaka Zulu, Deliwe, Isivumelwano neminye. Ikhono lakhe ekulingiseni ugcine ukuligqamisa emdlalweni iMuvhango. UCynthia oke waphumela obala ngokuthi uhlushwa yisifo sikashukela waze wanqunywa izinzwane, kuvela ukuthi ushonele eThekwini entathakusa izolo. UNonhle uthe "Kubuhlungu ukunazisa izindaba zokudlula emhlabeni kukamama wethu. “Ngiyanicela ukuthi nisibeke njengomndeni emikhulekweni yenu kulesi sikhathi esinzima," kusho uNonhle. Iningi losaziwayo lizwelane nale ntokazi iveza lezi zindaba ezishaqise abaningi. Umculi uThembi Seete uthe:"Phephisa sisi, siyazwelana nani ngokunehlele." UNhlanhla Mafu uthe:"Oh phephisa sthandwa sami". Inkakha endimeni yomculo uYvonne Chaka Chaka ithe:"Owesifazane omuhle kakhulu, lala uphumule sisi." U-Anele Mdoda uthe:"Oh sisi, sengathi uNkulunkulu anganengama wena…

ZIFUNGE zagomela ukuthi zizoqhubeka nokuwuvala ngamathayi avuthayo umgwaqo uR66, eShowe, izakhamuzi ezingenawo amanzi eZiqwaqweni, eMlalazi. Lezi zakhamuzi esezinengekile zitshele Isolezwe ukuthi sekuphele izinyanga ezimbili zingenawo amanzi. Omunye wazo, uMnuz Ntethelelo Mpungose, uthe okubacasula kakhulu wukuthi izakhamuzi zaku-ward 9, okuyi-ward engumakhelwane wabo, zona zinawo amanzi. “Sizizwa sideleleka siyizakhamuzi zaku-ward 10. Asiqondi ukuthi kwenzeka kanjani ukuthi ku-ward 9 abekhona amanzi, kuthi kweyethu, kungaphumi ngisho iconsi kompompi,” kusho uMpungose. Uthe bezwe ngandlebenye ukuthi kukhona abasebenzi bakaMasipala wesiFunda, iKing Cetshwayo, abathengwa yiqembu elithile lepolitiki ukuthi bavale amanzi ku-ward 9. “Asazi ukuthi lezi zinsolo ziyiqiniso kangakanani kodwa zisicabangisa okuningi ngoba ngempela asinikwa thina amanzi,” usho kanje. Uthe sebeze baqashe izimoto ezibabiza u-R200 ukuyobakhelela amanzi ku-ward 9. Uthe okubuhlungu wukuthi iningi alisebenzi, alinayo le mali. “Kudingeka ukuthi ukhiphe okungenani o-R200 ababili ngesonto ukuze uthole amanzi anele.…

AMALUNGU e-IFP asekhululekile ukugqoka izikibha ezinobuso bomholi weqembu, uMnuz Velenkosini Hlabisa. Lesi sinyathelo kuvunyelwane ngaso emhlanganweni woMkhandlu kaZwelonke kwi-IFP, obuseMpangeni, ngeSonto. Kulo mhlangano kuphinde kwavela nokuthi ingqungquthela yokukhetha ubuholi beqembu izoba ngonyaka ozayo. Isolezwe lithole ngemithombo yalo ukuthi amalungu eqembu, anikezwe imvume yokuthi afake izikibha ezinobuso bukaHlabisa. Phambilini amalungu eqembu abevunyelwe ukufaka izikibha zomsunguli weqembu, Inkosi Mangosuthu Buthelezi. Omunye umthombo uveze ukuthi ingqungquthela yokukhetha ubuholi beqembu izoba ngonyaka ozayo. Okhulumela i-IFP, uMnuz Mkhuleko Hlengwa, ukuqinisekisile ukuthi ingqungquthela yokukhetha ubuholi be-IFP kuzwelonke nasesifundazweni izoba ngoMashi. Uthe banqume ukuthi zonke izingqungquthela zibe ngonyaka ozayo ukuze kungaphazamiseki umkhankaso wokhetho. I-IFP yagcina ukuba nengqungquthela yokukhetha ubuholi beqembu ngo-2019, ngesikhathi uButhelezi edlulisela izintambo kuHlabisa. UHlengwa akazange ayiphendule imibuzo mayelana nokusetshenziswa kobuso bukaHlabisa ezikibheni. Umholi we-IFP ocele ukuba igama lakhe lingadalulwa, uthe ujabulise okwengane ngesikhathi uMkhandlu…

ISIGAMEKO sokushiswa kwesikole iMaphephetheni High eMatata, eNanda, sikhombisa ngokusobala ukuthi kusekude phambili ekutheni ikhululeke ngokuphelela imiqondo yabanye bethu. Ngendlela esenza ngayo sesiphenduke izitha kithina uqobo. Ibuhlungu into eyehlele izingane ezifunda eMaphephetheni. Akekho ongazi ukuthi iningi labantu bakithi lidonsa kanzima. Alinayo imali yokuyisa abantwana babo ezikoleni zabadla izambane likapondo. Uma umuntu exabene nothishomkhulu akabhekane naye uqobo, hhayi ukucekela phansi isikole esakhelwe ukuzokhanyisela izingane ezinsundu. Uma ushisa isikole usuke ucabangeni? Zizofundaphi izingane? Esikwenzayo kufanele sazi ukuthi kuzoba nomthelela ongemuhle ezinganeni. Izingane zizobhuquza emakhaya, ziphenduke amaphara noma zigcine sezishushumbisa izidakamizwa. Usuwashonaphi unembeza kubantu? Izibonda zendawo kuzofanele ziphenyisise baze batholakale abenzi bobubi. Kuzofanele bawukhombe onotshwala kuze nabanye bangalokothi bathathe amashansi okuthi benze okuphambene nomthetho ngokuzayo. Sikholwa ukuthi namaphoyisa azolusukumela lolu daba oluphelisa ithemba ngenqubekela phambili ngengane yomuntu omnyama. Silindele ukuthi izinhlangano zepolitiki zilusukumele lolu…

ONGUMQEQESHI weRichards Bay FC, uRonnie Gabriel, utusa ubunkunzi bomdlali wasophondweni lwesokudla, uSanele Barns, ngomehluko afike nawo kuleli qembu elisemshikashikeni wokuqeda isizini kwi-Top 8 ekupheleni kwesizini. Igoli likaBarns alishaye ngesiwombe sokuqala yilona elisize iRichards Bay ekubuyeni namaphuzu amathathu ekuhambeni iguqisa i-TS Galaxy ngo 1-0 koweBetway Premiership eMbombela Stadium, eNelspruit, ngeSonto. UBarns emidlalweni ewu-12 asayidlalile kwiNatal Rich Boys, useshaye amagoli amathathu, waba nesandla kwelilodwa. Ulokhu eqhubeka nokuba ngumdlali omqoka kuleli qembu laKwaZulu-Natal elibalwa nasemshungwini wamaqembu azabalazela ukuzibekisela indawo kwi-MTN8 ngesizini ezayo. “USanele Barns ulenzela umsebenzi omuhle iqembu. Amava akhe nomfutho anawo, uyakwedlulisela kubadlali abasebancane eqenjini ngokuba yisibonelo esihle kubona. "Amagoli ambalwa asewashayile enze umehluko ekusizeni iqembu. Kusukela efikile eqenjini ufike nomehluko obonakalayo,” kusho uGabriel oqeqesha ngokubambisana noPapi Zothwane. Ifomu kaBarns nomgqigqo wakamuva weRichards Bay kuza nesivivinyo esimqoka njengoba emdlalweni walo olandelayo lizobhekana…

USELUBALUBELA ukuyoyibamba kuma-Commonwealth Games, uLuvo Manyonga, kulandela ukuhlabana ngesicoco sikazwelonke kwi-long jump emqhudelwaneni we-Athletics South Africa (ASA) Senior Track and Field National Championships ngempelasonto, eStellenboch. UManyonga (35) uwine isicoco kuma-ASA Championships ngo-8.04 metres leap kwi-long jump, obekungokokuqala kusukela ngo-2019, egcina ukuthola impumelelo yalolu hlobo kwi-long jump. Ukuphumelela ngale ndlela kwale nsempe edabuka eMbekweni, eWestern Cape, kuyinkomba yokukhuza kwayo ibuya sekungatshazwa, kwazise ibuya esigwebeni seminyaka emine sokumiswa ekubambeni iqhaza kwezokugijima ngenxa yokusebenzisa izidakamizwa. Ngemuva kokuphela kwesigwebo sakhe ngo-2024, ubonakale okokuqala emqhudelwaneni wamazwe ngamazwe i-World Athletics Indoor Championships ebisePoland, ngoMashi. Waba ngumpetha womhlaba kwi-long jump ngo-2010, edla umhlanganiso kwi-World Junior Championships, eCanada. Wenza esifanayo nango-2011, edla umhlanganiso kwi-All Africa Games eMozambique, walandela ngokuba yingqwele kwi-World Championships ngo-2017, e-England. Waphinda wahlabana kuma-Commonwealth Games, e-Australia, ngo-2018. Kanti ngaphambi kwalokho, wayebuye nendondo yesiliva kuma-Olympic Games…