Table of contents for Jul-22 in Tuis

Einde Februarie lei ek ’n gesprek met Ingrid Jones en Annake Müller by die Stilbaai-Boekefees oor ’n wonderlike kookboek wat hulle uitgegee het – The Lockdown Recipe Storytelling Book. In my vooraf-navorsing lees ek hoe ’n plasing oor lugbraaiers op hul Facebook-groep omtrent ’n oproer veroorsaak het. ’n Lugbraaier, blyk dit, is ’n onvolprese stuk toerusting, veel meer werd as korale. Daar is blykbaar twee groepe mense as dit kom by lugbraaiers: dié wat klaar een het (“dit sal jou lewe verander”, is hul refrein) en dié wat vasberade is om binnekort een te koop (“hoe groot?” is al waarin hulle belangstel). Oukei, daar is seker ’n derde groep ook: die handvol mense wat nog nie oortuig is nie, soos ek. Ek hou van ’n lekker “gadget”, soos ’n staafmenger…

SKEP & VERNUWE! WIE Sian Rubelli WAAR KwaZulu-Natal BESIGHEID Shelby Finds HAAR WERK Nadat Sian Rubelli 14 jaar lank as vlugbeampte die wêreld deurreis het, het sy in 2020 na Suid-Afrika teruggekeer en Shelby Finds begin; só kon sy haar droom vervul en uitsonderlike handgemaakte skatte vir plaaslike huise bekom. Haar produkte word deur vakmanne vervaardig van natuurlike stowwe, en op etiese metodes verkry. Al Shelby Finds se tekstiele kom van Jaipur, Indië. Die Tiger Kantha-kwilt (heel regs bo) van suiwer Indiese katoen (230 x 270 cm; R1 950) word geblokdruk en afgerond met handsteke. Die matte word handgepluis met Indiese wol en het ’n katoenrugkant. “Ek hou my voorraad vars deur net klein hoeveelhede in te voer en is gedurig op soek na nuwe ontwerpe en kleurskemas,” sê Sian.…

WIE WOON HIER? Jeanine en Loubser Theron en hulle drie seuns, Tobias (6), Joshua (4) en Simon (9 maande) WAAR Die gasteplaas Britskraal, 10 km buite Strydenburg, Noord-Kaap-Karoo GROOTTE 290 m² As mens KwaZulu-Natal se lowergroen heuwels gewoond is, hou die Karoo se stofvlaktes maar min bekoring in. Dit was ook aanvanklik Jeanine Theron se gevoel oor die plaas buite Strydenburg wat sy in 2011 by haar pa, Pieter Claassen, geërf het. Pieter, oorspronklik ’n beesboer van Vryheid, het meer as 20 jaar gelede dié skaapplaas as ’n belegging gekoop. Hy het dit meestal van ’n afstand bestuur, daarom het Jeanine nooit ’n emosionele band met die plek gevorm nie. “As studente het ek en my man, Loubser, in die skuur daar oorgebly elke keer dat hy ’n oog oor…

• Die belangrikste is om die lang siglyne te behou. Dit is die “wow”-faktor wanneer mense instap en met een oogopslag die hele ruimte kan sien. In ’n groot vertrek soos hierdie is daar gewoonlik ondersteunende pilare – ek het dit as my beginpunt gebruik deur los kaste tussen hulle staan te maak. So het ek die plek in twee verdeel. • Meubels moenie te klein wees nie. Kies ’n paar stukke wat aandag trek. In my geval is dit die groot groen bank en die twee Gregor Jenkin-tafels. • Net so moet jy iets teen die mure hê wat meer as lewensgroot is, soos die foto’s wat ek as plakpapier laat druk het. • Met oorgroot items skep jy ’n ruggraat vir jou oorgroot ruimte. Nou kan jy kleiner…

Perfek vir vakansies Jennifer de Vries van Durban skryf Ek het die kombuisstorie in jul April 2022-uitgawe geweldig geniet. Ek is tans besig om ’n strandhuis te bou; watter wenke het julle vir kombuise in ’n vakansiehuis? Nico Alberts, binneontwerper en projekbestuurder, antwoord Toe ek my vakansiehuis in Struisbaai saam met medeeienaars gebou het, was daar net een voorvereiste: Dit moet altyd kuiergereed wees! Vandag is ons kombuis knus en gebruikervriendelik; dis deel van ’n oopplanleefruimte waar ons wonderlike tye saam rondom die eetkamertafel geniet – en dis presies wat ’n mens verwag van ’n vakansiehuis. My raad sou wees dat jy by jou begroting hou en verskillende materiale oorweeg vir tekstuur. Ons het staal, hout, grysgeverfde MDF en herwinde elemente gebruik vir warmte. So het ons byvoorbeeld soliede Oregondennehoutbalke…

DIE EIENAARS Jeani en Jean Johnson en hul dogtertjie, Milan WAAR Beaufort-Wes GROOTTE 8 x 7m + stoep van 3 x 7m Toe Jeani Johnson einde 2017 haar Karoo-man na sy hartland volg, was dit behoorlik sak en pak – selfs haar stadsidees vir mooimaak het saamgegaan. “Ná sy studies in die Boland moes Jean terug Beaufort-Wes toe om sy familie se slaghuis en vleisverwerkingsaanleg te help bedryf,” vertel Jeani. “Ons het altyd geweet ons gaan hier kom woon, daarom het ons ’n huis op die dorp gekoop. Ons het dit saam-saam opgeknap, hoewel my bydrae oor die telefoon uit Groenpunt gekom het.” Twee jaar gelede, in 2019, begin hul hande wéér jeuk vir so ’n lekker saamwerkprojek. Hulle het die verwaarloosde klein pakkamer in hul agterplaas in die visier…

Versamelstuk Peperomia is ’n genus tropiese huisplante inheems aan Mexiko, Suid-Amerika en die Karibiese Eilande. Hul opvallende dik, vlesige blare dra by tot hul gehardheid en verdraagsaamheid vir droogte. Hierdie plante is uiters gesog weens hul aantreklike ornamentele loof wat in ’n kits lewe in ’n ruimte bring. Peperomia caperata is ’n bekoorlike kompakte plant met donkergroen hartvormige blare gekenmerk deur diep riwwe. Van die somer tot herfs spog dit met dun, gepunte blomare. Maak een keer per week nat gedurende die winter en plaas dit in matige tot helder lig. Die klein waatlemoen-peperomia (Peperomia argyreia) het ovaalvormige vlesige blare met opmerklike silwer en groen strepe. Dit vereis helder lig, grond met ’n veenbasis, gereelde voeding en matige humiditeit. Hou sy waterbehoeftes goed dop. VIR DIE BEGINNER ’n Maklike huisplant…

Julie is gewoonlike ’n stil maand in die tuin; dis die middel van die winter en daar’s min aksie. Maar nie as jy mikrogroente wil kweek nie! Tuinertjies as mikrogroente is net so smaaklik en soet, indien nie soeter nie, as volgroeide ertjies. Kweek ertjies as mikrogroente op dié drie maniere Eerstens kan jy die spruite oes kort nadat die sade ontkiem het. Of jy kan hulle eers los totdat sagte blare ontwikkel voor jy hulle pluk as mikrogroente. Laastens kan jy hulle tot verby die mikrogroente-stadium laat groei om die eerste egte blare en hegranke te ontwikkel. Ertjielote is ’n gesogte garneersel vir enige kosfoendie. Só maak jy... • Gebruik enige ertjiesaad, van ‘Greenfeast’- stamertjies en ‘Oregon Sugar Pod’-sneeuertjies tot ‘Sugar Charm’- of ‘Sugar Snap Climber’-suikerertjies (almal van Kirchhoffs).…

Ludwig antwoord Die ouer donkergroen blare wys dat die rose water en voedingstowwe kon opneem ná verlede winter se rusfase en snoei. Maar toe hulle begin blom, het die kommunikasie tussen die blare en die wortels verander, aangesien die plant nou meer fosfaat en ander mikro-elemente nodig het om blomme en saad (roosbottels) te vorm. Nadat rose geblom het en dooi blomme afgesny is, het die wortels weer stikstof en potas nodig om te groei. Indien die wortels nie sekere mikro-elemente soos yster, boor en stikstof kan kry of absorbeer nie, sal die nuwe blare tekens van chlorose (bleeksiekte) begin toon. Dit kan wees dat die wortels nuwe dieptes in die grond of staande water bereik het weens al die reën. Die grond kan ook meer alkalies of gekompakteer wees.…

WIE Anton Bouwer WAAR Graaff-Reinet Van kleintyd af het Anton Bouwer, kaktus- en vetplantkweker van die Karoo, ’n liefde vir dié plante. “Ek het in my pa, Johan, se kwekery op Graaff-Reinet grootgeword. Hy het my aan talle kaktus- en vetplantspesies blootgestel en ek het hom graag gehelp. Van kleins af het ek die vorm en argitektuur van sekere plantjies baie interessant gevind. My eerste gunsteling was Pelecyphora aselliformis, en vandag is dit steeds bo-aan my lys,” vertel Anton. In 1999 het Anton die groothandelkwekery Obesa op die been gebring. Wat as ’n stokperdjie en passieprojek begin het, het met duisende verskillende spesies en ’n paar miljoen plante gegroei tot een van die wêreld se grootste kaktus- en vetplantkwekerye in privaat besit. “Ek het intussen die kwekery gesluit, maar liefhebbers…

Suurlemoen-enborriehoender met spinasie Dié kleurvolle bredie kort nie regtig ’n ekstra stysel nie, maar die sousie is darem lekker oor gestoomde rys... Genoeg vir 4 ruim porsies • Voorbereiding: 25 minute Gaarmaaktyd: 1 uur • 30ml olyfolie • 60ml botter • 4 hoenderboudjies en 4 dytjies, vel verwyder • 1 bossie spinasie, stingels en blare apart • 1 rooi ui, gekap • 2cm vars gemmer, geskil en gerasper • 3 knoffelhuisies, fyngekap • 5ml elk fyn komyn en koljander • 10ml borrie • 3ml fyn kaneel • 12 klein aartappeltjies, gehalveer • 1 blik (400g) kekerertjies, gedreineer • sowat 500ml hoenderaftreksel • 1 suurlemoen • Griekse jogurt vir voorsit (opsioneel) 1 Verhit die olie en botter in ’n dikboompan en braai die hoender tot oraloor goudbruin. Geur mildelik met sout en swartpeper en hou eenkant. 2 Kap die are van die spinasieblare fyn (dit het dieselfde…

Hoenderstokkies met soja en sriracha Onder R90 • Genoeg vir 8 stokkies Voorbereiding: 20 minute • Gaarmaaktyd: 18 minute • 750g hoenderdyfilette • 30ml sojasous • 15ml srirachasous • 30ml olyfolie • 1 ui, in kwarte gesny en in blare gebreek • 12 suurlemoenblare 1 Sny die hoender in happiegroot blokkies. Meng die sojasous, sriracha en olyfolie deur die vleis en geur met sout en peper. 2 Ryg die hoender, uie en suurlemoenblare op kort sosatiestokkies. Lugbraai vir 10 minute in ’n enkellaag by 200°C; draai om en braai nog 8 minute. Laat die vleis dan 5 minute lank rus. Wenk Hoenderdytjies is heerlik sappig, maar jy kan ook hoenderborsvleis gebruik. As die tyd knyp, los die stokkies en braai die hoender, ui en suurlemoenblare direk in die mandjie. Chorizo-rys met gekookte eiers Onder R100 • Genoeg vir 4…

GAWE BLARE Goodleaf CBD Snack Bars word gemaak met plantgebaseerde bestanddele en 10mg CBD per stafie. Dit is 100% wettig, niebedwelmend en bevat geen THC nie. Kies uit twee heerlike geure: Cocoa, Almond & Multi Seed en Vanilla, Macadamia & Multi Seed.Besoek goodleaf.co.za. Vier die samesyn Perdeberg Wines het pas SAAM, ’n reeks Fairtradegesertifiseerde etiese wyne bekend gestel. Kry SAAM Pinotage 2020 en SAAM Cabernet Sauvignon 2020 teen R75 elk by Pick n Pay Liquor. Sien meer by perdeberg.co.za. ’N FEES VAN SEEKOS! Nuwe Pescanova Easy to Cook Cut & Deveined Prawns is gereed vir braai, rooster, panbraai of mikrogolf. Kyk uit vir al vier geure – Chipotle Sea Salt, Salted Butter & Garlic, Citrus & Herbs en Chimichurri – in die vriesafdeling by jou naaste Spar en Food Lover’s…

WENBRIEF ’n Sagte landing Carol Smit van Durbanville skryf In ’n Ai Siestog-motortjie kom ons by die Ai Siestog-huisie en sy Ai Siestog-tuintjie aan, met die stil vraag in onse harte: “Hoe op aarde pas ons hier aan?” Donkiehuis in Reebok, die geliefde Toyota-bakkie en my Lushof-tuin behoort nou aan ander mense. Maar by die kraan was ’n stukkie gras en nog voor die meubelwa daar was, het ek begin tuinmaak. Later het Karooklippe van Pampoenpoort, stompe, en ’n wingerdkrans uit Santorini bygekom. En gelukkig ook ons twee bedorwe Scotties, Ratel en Karools. Die Hottentots-Hollandberge en Simonsberg laaf ons siele; ons herhaal Jaffie van Eitemal se woorde: “Dié wat terugkyk, verlang terug...” Ons is nou vyf maande hier; ons is tevrede en ons harte is gerus. Inspirasie Elizma Beyleveld van…

Die basispalet in albei ruimtes is neutraal, met spatsels kleur uit die plantegroei daarbuite. “Ek het nie ’n dekorstyl nie,” sê Lisa. “Ek ‘luister’ na wat die vertrek wil hê en begin dan met ’n kernmeubelstuk; van daar af ontwikkel alles organies. Ek meng graag antieke en moderne stukke met dié uit die middel-1900’s. Klaarblyklik vorm dinge wat op die oog af nie by mekaar hoort nie, ’n eklektiese verhouding sodra jy hulle uit jou hart uit saamvoeg.” KONTAK thestorer.co…

V: Is die skulpvormige teëls op bladsy 56 van die April 2022-uitgawe ook in Kaapstad beskikbaar, en waar kry ek die verskaffer? – Michele McCreadie, Kaapstad A: Tile Space (tilespace.co.za) het ’n tak by Paardeneilandweg 9 in Paardeneiland naby die stad. V: Waar kan ek gedraaide houtstoeltjies soos dié op bladsy 12 van jul Badkamers 2019-uitgawe koop? – Andrea van Heerden, Kaapstad A: Ons het die stoeltjies (soms “root stools” genoem) onlangs gesien by Block & Chisel (blockandchisel.co.za) en Design Store (designstore.co.za). Kyk ook by Decofurn (decofurnsa.co.za) en Weylandts (weylandts.co.za). V: Weet julle wat die kode is vir die houtskool verf aangedui as Plascon Velvaglo Chromodek Charcoal op bladsy 41 in jul Februarie/Maart 2022-uitgawe? – Douw Grobler, Kempton Park A: Die kode is PB=55.000; PD=14.000; PE=20.000; PI=11.500; PK=10.000. V: Wat…

Sag, warm en snoesig! Warm kopie Hoe oulik is Le Creuset se Pet Collection (R450-R975, lecreuset.co.za)! Dit bestaan uit kosbakke in twee groottes (perfek vir honde en katte) en ’n houer vir snoepgoed. Die duursame emaljelaag is bestand teen vlekke, skrape en roes, en maak maklik skoon. WEN!  Die eienaars van die diere op die foto’s wen ’n Nap Sack vir katte of ’n groot Hug Buddy-bed vir honde van Wagworld (wagworld.co.za; ook te kry by voorste troeteldier- en veeartswinkels). Die immergewilde Nap Sack met ’n linnevoorkoms kom in vier kleure wat by jou dekor sal pas terwyl dit jou dieremaat ekstra gemak en beskerming teen die koue bied. Die snoesige nesvormige Hug Buddy word gemaak van duursame seilstof en spog met hoë kante wat deur sagte stopsel ondersteun word;…

• Die tuinier se hooftaak dié maand is om veral vrugtebome en rose te snoei. Enige bladwisselende struike wat onnet geraak het, kan ook nou teruggesny word. Maak seker jy gebruik al die snoeisels om jou komposhoop aan te vul. • Dis nou ook ’n goeie tyd vir oorplant. Baie plante is dormant in die winter en die verskuiwing sal hulle nie benadeel nie. Indien jy jou tuinuitleg wil verander of van jou plante hul potte ontgroei het, spring aan die werk met ’n paar sakke kompos en potgrond.…

Mari Loftie-Eaton van Windhoek skryf Hierdie agave is ’n groot vreugde in my tuin, maar ek sien sy buiteblare word bruin. Waarom sou dit gebeur? Die pot staan in volson en kry een keer per week water. JJ antwoord Die hitte van die stene en gruis onder die plant kan dit moontlik brand; of die dreineergate onderin die pot kan verstop wees, sodat dit water terughou wat die wortels kan laat vrot. Haal die plant uit die pot, sny al die dooie blare af, verplant en behandel met die swamdoder Mycoguard. Luister Saterdae om 07:40 na JJ se Groen Vingers-tuinpraatjie met Derrich Gardner in sy program Brêkfis met Derrich op RSG.…

1 GROEIMEDIUM Om dié waterwyse plante suksesvol te kweek, moet jy die regte groeimedium kies en sorg vir goeie dreinering. Hoewel elke spesie ’n spesifieke medium vereis, kan tuiniers hul eie groeimedium maak waarin die meeste met groot sukses sal groei. Ek gebruik ’n mengsel van vier gelyke dele kompos, growwe sand, fyn sand en gewone tuingrond. Meng dit deeglik. Pleistersand kan as fyn sand gebruik word en riviersand as growwe sand. 2 SONLIG Die regte hoeveelheid sonlig is belangrik: Sommige vereis meer en ander minder. In ’n minder geharde klimaat kan 95% van die plante volson hanteer; meer plante as wat ’n mens sou dink groei egter ook goed in halfskaduwee of gefiltreerde sonlig. Omdat dit belangrik is dat ’n plant van die begin af op die regte plek…

“In my volgende lewe,” hoor ek ’n seuntjie sê, “is ek ’n Spitfire.” “’n Watsegoed?” Dis sy oupa wat vra. Die twee sit by ’n tafeltjie in ’n klein koffiekroegie in die middedorp. Oupa drink cappuccino wat sy gesonde snor ontsier en die knapie sit met pannekoek en melkskommel. “’n Spitfire, oupa, vliegtuig,” herhaal hy. “Jy kan nie ’n masjien word nie. Jy moet mos ’n lewende ding wees.” “Maar oupa sê dan oupa word ’n stuurwiel.” Die oupa glimlag. “Nee, man. Ek word ’n stier, dis ’n sterk jong bees. Wees jy liewer ’n draak, een wat vuur kan spoeg.” “Ja-a-a-a!” Soos Vikings klink die twee hul drinkgerei. Ek sit eenkant en wonder hoe dié twee op reïnkarnasie beland het. Tot ek die troppie jong meisies by ’n ander…

Groepterapie Sy sal nooit ’n minimalis kan wees nie, want mooi goed is haar lewe, sê Sumien Brink, voormalige redakteur van die dekortydskrif Visi. Maar sy noem haarself ook nie sommer ’n versamelaar nie; miskien is dit eerder ’n geval dat sy mooigoed raaksien waar ander dit dalk sou miskyk. Sy trek dit aan soos ’n magneet! Oral in haar woonplek (sien bl. 56) groepeer sy graag dinge bymekaar, en dié uitstallings kan gedurig verander. Die geheim is om dieselfde soort items saam te groepeer, anders word dit net ’n deurmekaarspul, is haar raad. Sumien se werkplek is in haar slaapkamer, voor wat sy haar “inspirasiemuur” noem (oorkant). Heel bo is ’n foto wat haar broer, die fotograaf Corrie Hansen, lank gelede van Tafelberg geneem het. Daaronder hang sketse van…

WIE WOON HIER? Pieter Erasmus WAAR Calitzdorp GROOTTE Hoofhuis 160 m², nagmaalhuisie 60 m² Wanneer dit herfs is in Delhi trek die temperatuur by 34 grade. Dis rumoerig en bont van al die kleure. Sowat 32 miljoen mense woon hier. Ver daarvandaan, in Calitzdorp, is dit herfs en omtrent 29 grade wanneer Tuis hier kom foto’s neem. Die strate lê stil onder die Klein-Karoo se blou lug. Sowat 4000 mense woon hier. Agt jaar gelede het Pieter Erasmus die skuif gemaak van Indië terug na Suid-Afrika; hy het begin besef Indië vra te veel van hom. Eers was dit anders: Toe hy in 2005 daar aankom, het die land sy voete onder hom uitgeslaan. “Maar dan kom jy op ’n punt waar jy besef dele van jouself verander om aan…

’n Besonderse donkerblou verfkleur het in 2016 al die dekorkenner Misi Overturf se oog getref; sy vertel hoe sy dit met welslae in die Du Toit-huis gebruik het: Die kleur teen Errieda se fokusmuur is diep, maar nie strak nie, sê Misi. “Dit word as’t ware ’n neutrale skilderdoek en beklemtoon al die elemente wat jy wil aksentueer. Die blou laat die kunswerke daarteen uitstaan en definieer die argitektoniese detail. Ek is mal oor wat lig, donkerte en skaduwees met die kleur op mure kan doen. “Deesdae meng Pits Paints in die Paarl die kleur vir my volgens my eie formule met ’n Dulux-basis. Ek noem dit Dave’s Blue, na my oorlede pa.” Misi werk graag met wasbare mat verf. “Blink verf wys elke foutjie teen ’n muur uit. En…

PROJEK #1: INSTALLEER DIE PANELE Wat jy nodig het PROJEKGIDS  Harde werk 3/10 Vaardigheidsvlak 3/10 Tyd nodig 1 uur Doen dit self vir ± R1090: Hout R980, skroewe R110 INKOPIELYS • sewe lengtes geskaafde dennehoutplanke (22 x 69 x3 000 mm) • een pakkie spaanderbordskroewe (6 mm x 40 mm) • veertig inkap-ankers (6 mm x 75 mm) • houtvuller GEREEDSKAP • maatband • waterpas • potlood • saag • koordlose boor en 3mm-boorpunt • betonboor en 6mm-boorpunt PROJEKNOTAS • Meet en merk noukeurig. • Wanneer jy twee planke vir die rak moet heg, saag een ent van elkeen teen 45 grade en heg die planke met die skuins rande teen mekaar (sien stap 4). Dit verseker ’n netjiese las wat gelyk bly. 1 Merk waar die boonste dwarsplank moet…

Lorren Barham, veterinêre terapeut by Pet Wellness Worx, antwoord Gereelde oefening is uiters belangrik. ’n Kort stappie elke dag is selfs vir ’n baie ou of baie jong hond veel beter as om te probeer opmaak vir verlore tyd deur die week, aangesien die risiko vir beserings groter is. Maak oefening deel van jou roetine en sit elke dag 10-15 minute opsy vir ’n stappie in die park of ’n vinnige swem ná werk. Gereelde oefening verminder die kanse op vetsug, wat ’n risikofaktor vir osteoartritis is. Dit bied goeie stimulasie en help dat diere hul oortollige energie verbrand, wat hulle minder vernielsugtig of depressief by die huis maak. Seniors Troeteldiere word as senior beskou op die ouderdom van sewe jaar, en as oud vanaf 10. Oefening help dat dié…