Table of contents for Weskus, Namaqualand Reisgids 2024 in Weg!

Met ’n Wimpykoffie in jou kar se koppiehouer en jou gunstelingliedjielys wat speel, is dit maklik om te dagdroom wanneer jy Kaapstad verlaat en die N7 noordwaarts vat. Moeiteloos is jy binne twee ure by Die Kardoesie-padstal op die Piekenierskloofpas anderkant Piketberg. In die tyd van perdekarre, pakdonkies en ossewaens was dit egter ’n weke lange gedoente net om hierdie punt te bereik. En dit boonop sonder enige padstalle waar jy aan ’n koeksuster kan weglê! In 1660 stuur die Verenigde Oos-Indiese Kompanjie (VOC) vir Jan Danckaert uit die Kaap op ’n verkenningstog om ’n roete na Namakwaland te vind. Khoi-Khoigidse neem hom oor ’n bergreeks na ’n vallei waar hy ’n groot trop olifante langs ’n rivier sien. Hy noem hierdie rivier die Olifantsrivier en die bergreeks waaroor die…

Vir groot dele van die jaar dra die Weskus ’n vaal kleed. In die somer is dit droog, die koringlande is kaal en alles is stowwerig. Maar dan begin die winterreën, en kort voor lank skemer ’n groen bedekking deur. Gou-gou is die wêreld versier met geel gousblomme, wit madeliefies, pienk vygies en rooikatsterte. As jy die Weskus op sy mooiste wil sien, is vroeglente die beste tyd vir ’n besoek. Goeie beplanning is noodsaaklik vir ’n suksesvolle blomtoer. Jy gaan baie moet rondry na waar die blomme staan. Dis ’n road trip, selfs al beplan jy net ’n eendagroete. Pak padkos en ’n piekniekmandjie, ’n blomgidsboek en ’n kamera met ’n makrolens (jou selfoon sal ook deug). Loer in by padstalle – talle is spesiaal oop nét in die…

PATERNOSTER Ek het op Vredenburg grootgeword en onthou hoe ons gesin dikwels op ’n Sondag ná kerk deurgery het Paternoster toe net om te “kyk hoe dit lyk”. Van Vredenburg af loop die R399 vir 15 km deur golwende heuwels direk kuslyn toe. Jy ry oor ’n laaste bult en skielik lê ’n streep spierwit huise knus teen die Atlantiese Oseaan se donkerblou. Dié stukkie paradys is Paternoster, die Weskus se gunsteling-kusdorpie. Daar sou ons ’n draai stap na waar die vissersbote hulle vangste sommer op die strand verkoop; agterna het ons dikwels by die Voorstrandt-restaurant vis-en-tjips geëet. In die lente het ons gaan blomme kyk wes van die dorp by die Kaap Columbinevuurtoring, en by Tietiesbaai ons voete in die see gedruk (want die Weskus se water is selde…

Die oggendson laat glinster die kuiwe van die branders oomblikke voordat hulle op Yzerfontein se 16 Mylstrand breek. Ek sit saam met ’n paar toeriste en personeel van Whale Expedition SA op ’n rubberboot. Dis net ná agt in die oggend, en alles dui daarop dat dit ’n perfekte Januariedag aan die Weskus gaan wees. Ek was al vroeg op by die gastehuis waar ek op die dorp oornag het – ons moes immers reeds om 6.30 vm. by Whale Expedition SA se basis aanmeld vir ontbyt. Terwyl ons smul, het die hoofgids Jacques Buys verduidelik hoe die dag gaan verloop. ’n Skyfievertoning het ons meer omtrent die geskiedenis van die boggelrugwalvis vertel. Sedert 2011 word heelwat van dié spesie tussen November en April aan die Weskus opgemerk. Hulle is…

Grootse stiltes, ewe stil klippe en skaars plante is die Richtersveld se groot trekpleisters. As jy ’n 4x4 het, kan jy maklik jou eie toer deur die streek beplan: Spring weg by een van die kampe langs die Oranjerivier naby Vioolsdrif en mik vir die klein dorpies Eksteenfontein en Lekkersing. Draai dan na Sendelingsdrift, waar jy die /Ai/Ais-Richtersveld-oorgrenspark binnegaan. Moenie haastig wees nie – jy het ten minste drie dae binne die park nodig. Daarna kan jy gaan afkoel by Alexanderbaai, waar jy die laaste kilometer van Suid-Afrika se westelike kuslyn kan betrag. Hierdie foto is geneem naby die Kokerboomkloof-kampplek in die /Ai/Ais-Richtersveld-oorgrenspark (sanparks.org).…

LAMBERTSBAAI Onder die stoepdak by Malkoppan se kuierplek word pannekoek gebak, gerol en by die stapel verkoop. ’n Mince jaffle is joune as jy hom soek. Koelbokse word oopgeknip, stoele nadergetrek en elke nou en dan vee ’n volgende kar se ligte oor die perseel wanneer nóg mense opdaag. Onder die tent wat oor ’n deel van die grasperk span, is iemand besig om die draaiende pers en blou ligte vir later se dans reg te kry. Dis ’n Vrydagaand in Maartmaand en aan samesyn is daar geen tekort by die Lambertsbaai-kuiernaweek nie. Ian Turner van die Muisbosskermrestaurant (net oorkant die pad, see se kant toe) is besig om te braai, sommer twee roosters gelyk. Uit ’n woonwatjie daarnaas verskyn slaptjips in foamalite-bakkies. Steeds kom die mense: jonges wat rondhol…

HONDEKLIPBAAI Dis maklik om te grap dat die mense op hierdie dorp seker ’n hondelewe lei. Maar dis iets wat slegs iemand wat nog nie dié plek besoek het nie, sal kwytraak. Want inderwaarheid is hier genoeg inwonende kunstenaars, diamantduikers en verloopte stedelinge om Hondeklipbaai verbasend interessant te hou. Dis ook die laaste rusplek van menige skeepskaptein wie se skip hier op die rotse geloop het. En wanneer die vuurtoring se ligstraal deur die mis flits (drie keer elke 15 sekondes), is dit maklik om jou in te dink hoe die matroosspoke uit die Atlantiese Oseaan opdoem en deur die branders wal toe sweef – dalk vir ’n laaste dopsteek op die strand. Toegegee, dit lyk ’n bietjie vervalle wanneer ’n mens die eerste keer hier aangery kom. Te oordeel…

Die see aan die Weskus is gevaarliker as vlam of vuur. Selfs hier, ver van die Kaap van Storms. ’n Ysige wind sny dwarsdeur my baadjie. Op Alexanderbaai se strand dreun ’n graafmasjien – die stomp naels aan sy enkele klou skeur deur die laaste van die ou myngeboue wat afgebreek word. Vragmotors ry die uitgeleefde oorskot weg. Ek ril, vryf my hande saam en keer terug na die warmte van my ryding. Die plan is om kuslangs terug te ry Kaapstad toe en elke moontlike vuurtoring aan te doen. Alexanderbaai het nie een nie, maar as jy wil sê jy het die héle Weskus gery, moet jou roete hier begin. Ry hiervandaan suidwaarts met die R382-teerpad na Port Nolloth waar jy die eerste vuurtoring aantref: Hierdie een is eintlik…

As gebore Namakwalander hunker ek na uitspan by water wanneer ook al ek kan, veral in Desembermaand. Die Atlantiese Oseaan by Port Nolloth is 145 km van Springbok af en deesdae teerpad. Maar 60 jaar gelede, in my kinderdae, was dit meestal grondpad soontoe en ’n hele optog. Net suid van Port Nolloth lê McDougallsbaai wat ons gesin se bestemming was vir somervakansies. My ouers sou vir my en my broer op Springbok in die ou Kombi laai, en dan het die groot trek see toe begin: verby Okiep, dan Steinkopf (waar jy wes draai), Klipfontein (waar daar lang jare gelede ’n hotel was wat die stoomtrein bedien het wat koper en passasiers vervoer het na “die Port” se hawe), af met Anenouspas, verby Xnoasies, oor Grasvlakte en uiteindelik tot…

Laaste lig Rooibaai, Laaiplek Ek hou daarvan om ’n lang sluiterspoed te gebruik omdat enige landskap met beweging (soos water, wolke of gras wat roer) dan meer dramaties voorkom. Die hoofvoorwerp van my foto – in hierdie geval die kaai – beweeg egter nié, en daarom vestig dit die kyker se aandag daarop eerder as die kabbelende water, wat vervaag. Hierdie foto is geneem by Rooibaai, net stroomop van Laaiplek. Die beste tyd vir ’n lang sluiterspoed is kort ná sononder, want dan het jy minder natuurlike lig (jy wil nie die toneel oorbelig nie). My kamera was uiteraard op ’n driepoot (ek gebruik die Gitzo Mountaineer Series) en ek het ’n afstandbeheerder ingespan om kamera-beweging te voorkom. Ek het ’n Lee Big Stopper ND-filter gebruik – ND staan vir…

Die Weskus bied prentjiemooi kusdorpies en beeldskone, windverwaaide landskappe. Hier is unieke ekostelsels wat die tuiste is vir ’n oorvloed wild, asook plaaslike seekos soos snoek, bokkoms en vars kreef om te geniet. Hierdie toer volg die kuslyn van Kaapstad tot by die Oranjerivier en verken juwele langs die pad. Jy word gelei deur ’n ervare gids en die toer bevorder veilige en omgewingsensitiewe maniere van reis. Ons bossjef berei alle maaltye voor, insluitend vars slaaie en braai-etes. Hoewel die oornagslaapplekke soms basies is, word veiligheid altyd voorop gestel en jy is verseker van ’n onvergeetlike avontuur met kulturele, geskiedkundige en natuurhoogtepunte. Die toerplan draai by ikoniese plekke soos Paternoster en Hondeklipbaai, en ’n mens kamp naby die see met die branders wat jou saans aan die slaap sus. Indien…