Huisgenoot 14 April 2022

1 PRINSES CHARLENE WEER TERUG IN MONACO Die prinses is weer in die paleis verenig met haar man, prins Albert, en hul kinders. Maar die stories dat sy sielsongelukkig is, wil nie gaan lê nie Ek hoop en bid dit gaan nou goed met haar. Ek hoop ook prins Albert maak dit makliker vir haar. ’n Mens skei nie net nie; hulle het kinders saam. Sy moet ’n weg vind om dit vir haarself makliker te maak. Ek lief haar. RIA Dit is ’n keuse wat sy gemaak het. Sy was voor hul huwelik lank genoeg betrokke by hom om te weet wat die implikasies sou wees. Maar sy kan weer kies. Diana het gekies om te skei; sy kan ook. GERTJIE Dis nie so maklik nie. Sy sal nie die kinders kan landuit neem nie,…

IN DIE kar op pad huis toe het hulle lekker gelag en gesels. Sommer oor koeitjies en kalfies. Maar dis ’n herinnering wat Lauren Carolus altyd sal koester, want in ’n oogwink is drie van haar naaste geliefdes vir ewig stilgemaak. Lauren en haar man, Kurt-Lee (30), het na ’n nuwe huis in Athlone se Belgravia Estate gaan kyk. Kurt-Lee en hul oudste dogter, Tara-Lee (4), asook haar ma, Yolande Geduldt (51), is dood toe ’n vierwielaangedrewe bakkie in hul stilstaande kar vasgejaag het. Net Lauren (30), haar babadogter, Taliyah, en Lauren se broer, Luke (20), het naelskraaps ontkom. Die bestuurder van die bakkie was na bewering dronk. Dit was ’n afgryslike einde aan ’n vrolike uitstappie. Die familie het Lauren en Kurt vergesel toe hulle na ’n huis gaan kyk het. Maar op…

‘EK PROBEER ELKE OOMBLIK KOESTER, SELFS WANNEER HULLE MY MOEDELOOS MAAK’ DIE houtdeure van die dubbelverdiepinghuis bars skielik oop en ’n kaalvoetmeisietjie met ’n woeste krullebol gryp jou aan die hand en draf met kort treetjies tot in die kombuis. “Kyk!” skree die kleinding en wys na ’n verdwaalde veldkriek. “Spring!” beveel sy die insek, maar dié gee geen gehoor nie. Die trane wil-wil kom, maar haar ma, die aktrise Reandi Grey, is al geolie in hierdie soort speletjie. Sy’t haar twee maande oue baba op die heup, maar vlieg op en gee die insek so ’n ligte stampie met haar groottoon. Toe die outjie met mening oor die kombuisvloer hop, weerklink klein Heidi (2) se opgewekte kinderlaggie deur die huis. Maar die stryd is helaas nie gewen nie: Heidi se lag laat kleinsus…

Omdat die 550 leerders almal leeruitdagings het, kry Oom Paul ’n maandelikse toelaag per kind van die departement. Nog ’n plan om geld na die herstelprojekte te herlei was om vir eers skooluitstappies te staak. “Wat help dit hulle gaan toer as hulle nie eens ’n werkswinkel het om houtwerk in te doen nie?” Die bydraes van ouers en die groter gemeenskap van Rustenburg was deurslaggewend, vertel Cas. “’n Ouer het die sand vir die vlugbalbaan geskenk, en daai sand is duur! MTN het ’n hele rekenaarklas met die beste rekenaars op die mark ingerig; iemand anders het vir ons die kookkunsklas oorgedoen en alles, van die teëls tot die oonde, vervang. Ons is regtig geseën.” Een van die myne het twee nuwe skoolbussies geskenk. “Wat al ons skenkings beloop, is moeilik om…

OP DIE brose ouderdom van vier maande moes sy lyfie reeds meer mediese prosedures deurmaak as wat die meeste mense in hul leeftyd sal ervaar. Beenmurgonttrekkings, bloed- en bloedplaatjieoortappings, twee aggressiewe rondes chemoterapie … Dit alles het klein Rayaan Madhav, van Norwood, Johannesburg, al oorleef. Die rede is akute miëloïede leukemie, ’n vorm van bloed- en beenmurgkanker wat op agt weke by hom gediagnoseer is. Haar seuntjie het die meeste van sy kort lewe in die hospitaal deurgebring, vertel sy ma, Arlene. En op dae dat hy gesond genoeg is om by die huis te wees, kan hy nie eens buite wees nie; die chemoterapie het sy immuunstelsel verswak. Die siekte oorheers ook Arlene se lewe. “Ons word maande aaneen geïsoleer,” vertel sy. “Maar Ray is ’n vegter met ’n sterk wil om…

DIS ’n ongewone versoek van ’n tienerseun. “Ma, Pa, koop asseblief Huisgenoot sodat ek die blokraaie kan invul.” Maar dis presies wat Recardo August week ná week gevra het toe die blokraaigogga hom in sy tienerjare met mening gebyt het. En vandag nog is dit na daardie bladsye wat hy heel eerste blaai wanneer hy die tydskrif oopmaak. “Ek doen eerste die blokkiesraaisels en sal dan oor ’n dag of twee eers die artikels lees,” sê Recardo (42) laggend. “Dis soos adrenalien wat my dryf. Selfs wanneer ek by iemand se huis kom en ’n blokraai sien, sal ek sê: ‘Ek wil nou nie voorbarig wees nie, maar kan ek dit maar saamvat?’” Tussen die weeklikse Huisgenoot, die Huisgenoot-blokraaitydskrifte en die blokraaie wat hy by ander aas, vul hy daagliks ’n allemintige 20…