Landbouweekblad 07 April 2022

IN ’N BLIK VERWOESTENDE VRETERS. Reuseswerms bruinsprinkane is teen einde Maart gewaar in die omgewing van Willowmore, Jansenville en Wolwefontein, al drie belangrike produksiegebiede vir skaap-, boken sybokhaarproduksie. Die plaag volg ná goeie reënval die afgelope somer ’n einde gebring het aan ’n uitmergelende droogte van sewe jaar of meer, en bedreig nou opnuut boere se veld. Sprinkaanswerms is vanjaar ook gewaar in gebiede waar hulle nooit tevore of vir die eerste keer in 40 jaar weer gesien is, soos die Calitzdorp-omgewing in die Klein Karoo, asook die Baviaanskloof in die Oos-Kaap. Die vrese bestaan dat indien swerms op groot skaal na die gewasproduksiegebiede van die Groot-Visriviervallei uitbrei, dit ’n uitwerking op nasionale voedselsekerheid kan hê, sê me. Andrea Campher, risiko-en-rampbestuurder van Agri SA. Dié foto is tussen Willowmore en Steytlerville…

Dit was die bekende en gewoonlik heel optimistiese Johannesburgse makelaar David Shapiro wat baie mense se gevoelens oor pres. Cyril Ramaphosa se onlangse beleggingberaad mooi saamgevat het in sy Twitter-kommentaar oor die mooi broodjies wat weer daar gebak is. ’n Saamtrek waar baie van Suid-Afrika se topsakemense bymekaar gekom het om allerhande stories te vertel oor die bykans R1,5 duisend miljard wat hulle beoog om in die ekonomie te belê. Maar ondanks al die beloofde geld (wat natuurlik uiters welkom is), kan die land steeds geen ekonomiese groei daarvoor wys nie. Suid-Afrika se werkloosheidskoers bly steeds die hoogste ter wêreld, en ons ongelykheid die diepste. “Pleks daarvan om ’n pak klere en ’n das aan te trek en ’n beleggingberaad te hou, trek eerder overalls aan en begin werk aan die basics,”…

EDELE HARTE Ek kry hom met ’n bakhand voor die bottelwinkel staan. Hy sing ’n versie: “Immer spoelend, wieg’lend woelend.” Sy oë is troebel en sit diep en versonke, soos verstekelinge in ’n spelonk-skuiling, vir my en kyk. Sy oogbanke met weerbarstige wenkbroue en die neus met fyn aartjies soos dié van die hoofouderling in ’n nagmaalkerk. Die spore van Bacchus maak diep dongas op sy gelaat. Die kleur van sy gesig laat my dink aan ’n kruising tussen laatoes of grand cru en rosé, en, noudat ek daaraan dink, miskien ’n klein knertsie jeripigo. Sy lippe vorm die woorde, maar die geluid hoor ek slegs in my geestesoor. Ek hoor omdat ek deurgrond: “Ek het dors.” Ek kyk deur hom en sien ’n man wat worstel. Met groot en ernstige dinge. ’n…

Diegene wat water besoedel, moet in hul spoor trap, het mnr. Senzo Mchunu, minister van water en sanitasie, gewaarsku. Daar gaan strenger teen besoedelaars opgetree word. Dit gaan die oplê van boetes insluit. Mchunu het op ’n mediakonferensie op 22 Maart, Wêreldwaterdag, gesê die departement versnel die bedrywighede van sy teenbesoedelingtaakspan om aan alle watergehalte- en besoedelingsprobleme in Suid-Afrika aandag te gee. Hy het gesê die monitor en afdwinging van die nakoming van regulasies rakende besoedeling is een van die taakspan se belangrikste take. Hoewel beleidsrigtings en standaarde bestaan om besoedeling teen te werk, is daar probleme met die nakoming hiervan. Die gebrekkige behandeling van huishoudelike afvalwater is die hoofbron van besoedeling. Dit sluit lekplekke in of probleme met die stelsels wat afvalwater na suiweringsaanlegte bring, asook die aanlegte self. “Ons het 1…

Mierhoop op P., Tvl., skryf: Ek het altyg gedink dat By die Opsitkers ’n rubriek is waarin ons jong mense oor en weer gedagtes kan wissel. Nou het dit in ’n blote man- en vrousoekery ontaard. Ek is glad nie nougeset nie. Ek weet ook wat eensaamheid is. Maar waarom moet die jong mense hulself so belaglik maak deur al hul hoedanighede te adverteer? Is daar nie baie ander maniere om jong mense te ontmoet nie? Dit is veral jong boertjies wat te lui en gemaklik geword het om vir hulle ’n vrou te soek. Hulle sit ewe gemaklik daar op die plaas, kyk die foto’s van die nooiens wat aan hulle geskryf het deur, en besluit oplaas dat die nooi met die mooiste gesiggie voorkeur sal kry. Of dié aster kan…

AFGRI Retail is die borg van reeks 16 van Landbouweekblad se gewilde TV-program, Landbou-weekliks, wat op VIA (DStv-kanaal 147) uitgesaai word. Een kyker wen weekliks ’n geskenkpak ter waarde van R2 000 wat by enige AFGRI Retail-winkel reg oor Suid-Afrika gebruik kan word. Hier is die mees onlangse wenners: Ulse Prins, Mosselbaai (episode 6, 22 Februarie). Thabiso Ramose, Migdol (episode 7, 1 Maart.) Hendrik Victor, Verkeerdevlei (episode 8, 8 Maart). Tilla van Vuuren, Wolmaransstad (episode 9, 15 Maart).…