Landbouweekblad 12-Oct-18

28% Die dieselprys het tot dusver vanjaar met 28% gestyg, en die petrolprys met 25%. Rekord-brandstofprysstygings het begin Oktober in werking getree – R1,01/l vir petrol en R1,24/l vir diesel, wat die land se ekonomie sowat R2,5 miljard sal kos. Mnr. Layton Beard, woordvoerder van die AA, sê dit is die grootste prysstygings in die land se geskiedenis, en die skuld kan vierkant voor die deur van die chaotiese ekonomie gelê word. Lees meer op bl. 14. — Business Day R235m. ’n Wynplaas buite Franschhoek is in die mark vir die rekordprys van R235 miljoen, wat daarop dui dat praatjies oor onteiening sonder vergoeding en die droogte skynbaar nie ’n groot uitwerking op buitelandse beleggers se aptyt vir ’n trofee-wynplaas in Suid-Afrika gehad het nie. Tot dusver vanjaar is minstens drie wynplase in…

‘SO SKOU JY’ ’n Groep beeshanteerders het op die onlangse Windhoekskou ’n kursus bygewoon waar hulle die fynere kunsies van die korrekte manier om ’n dier vir beoordelaars aan te bied, geleer het. Die kursus is deur twee Namibiërs, mnre. Dawid Krause (regs) van Feedmaster en Bertus Dorfling (links), raadgewer oor lewende hawe, aangebied. Hier gebruik hulle ’n koei met haar kalf as voorbeeld. Honderde beeste, skape en bokke van oor die hele land het aan die skou deelgeneem. GROND-WAARSKUWING Suid-Afrika kan eindig waar Venezuela nou is as die grondkwessie nie opgelos word nie. As Suid-Afrika nie die Nasionale Ontwikkelingsplan in werking stel nie, gaan die toekoms ’n ontluikende ekonomie soos Suid-Afrika s’n straf. Só het prof. Mohammad Karaan, lid van die Nasionale Beplanningskommissie, gewaarsku op die Landbou-ekonomievereniging van Suid-Afrika se jaarlikse konferensie.…

FLINK EN PRONKERIG. ’n Span van agt Walliese Ponies van die Jacobs-stal in Philippi ry ’n pronkronde op die onlangse Tulbagh-skou. Die drywers is Abdul Jacobs, Tasneem van Boom en Ebrahim en Cassiem Jacobs. Me. Elizabeth Russell, voorsitter van die Walliese Ponie-en-Kob-moedersvereniging in Brittanje, is genooi om oor vyf dae die Walliese Ponies op dié skou te beoordeel. “Suid-Afrika se skouponies het groot potensiaal,” sê sy. “Veral die hingste in die tuig was vanjaar van ’n uitstekende gehalte.” Hulle is uiters veelsydig. Beoordelaars kyk vir lewenskragtige ponies wat hul tuig met lus trek. Waar die klem by Hackney-ponies op fynheid lê, soek beoordelaars by Walliese Ponies natuurlike maanhare en sterte en breë, manlike kake.…

’N SLEUTELELEMENT van pres. Cyril Ramaphosa se Nuwe Daeraad is om beleidsekerheid te verbeter ten einde ’n beleggingsvriendelike omgewing te skep, maar dit lyk of die teenoorgestelde gebeur het met die Regering se stap om in September ’n betreklik ligte brandstofprysstyging – van sowat 30c/liter – te absorbeer. Voorverlede week het die Suid-Afrikaanse Petroleumbedryfsvereniging (Sapia) in ’n agtergrond-inligtingsessie laat blyk die prysverhoging is geabsorbeer uit ’n trustfonds waaruit oliemaatskappye eis wanneer die kleinhandel-brandstofprys te laag is vir hulle om die prys te verhaal waarteen hulle olie in ’n bepaalde maand op die internasionale mark gekoop het. In Augustus het mnr. Jeff Radebe, Minister van Energiesake, Sapia oortuig daar is genoeg geld in die fonds om oliemaatskappye te vergoed vir die onderverhaling wat hy op hulle afgedwing het. Die eindelike koste daarvan…

‘ ’n Amptenaar het aan my gesê ons gaan soos Rwanda word.’ PROF. PETER DELIUS, emeritus-professor aan Wits, oor etniese en gemeenskapskonflik wat blyk uit mededingende grondeise. Bl. 25 ‘Mense sê die verlede is verby, maar die werklikheid is dat ons huidige situasie deur die verlede gevorm is.’ ADV. TEMBEKA NGCUKAITOBI, grondkenner en -aktivis, oor blywende ongelykhede in grondbesitpatrone. Bl. 24 ‘Die groot geveg gaan nou oor aan wie die bokhaar behoort.’ MNR. ISAK STAATS, hoofbestuurder van BKB se wol-en-bokhaarafdeling, oor die Lesotho-regering se uitvoerverbod op vesel. Bl. 16 ‘Kunsmis, plaag- en onkruiddoders se prys word ook van die olieprys afgelei, daarom kry boere twee vuishoue wanneer die brandstofprys verhoog word.’ MNR. PAUL MAKUBE, landbou-ekonoom by FNB, oor die reusebrandstofprysstyging. Bl. 14 ‘Die huurtermyn behoort eerder 50 jaar of langer te wees.’ MNR. PIERRE VENTER van die Bankvereniging van…

Ons het verlede week Landbouweekblad en die Overberg-renosterveldbewaringstrust se mees onlangse velddag by Napier gehou. Die velddae bring boere, plantkundiges en ekoloë in die veld byeen om van mekaar te leer, en maak die skaamste mense spraaksaam. Dr. Odette Curtis-Scott en haar span se enorme taak om renosterveld, een van die mees bedreigde veldtipes ter wêreld, te probeer bewaar en herstel, word saam met boere aangepak. Niemand weet hoe renosterveld gelyk het voor die mens begin paaie bou, sand myn, ploeg en vee aanhou het nie. Aanhoudende en waagmoedige eksperimente toon egter renosterveld moet soms gebrand en vir kort tye bewei kan word — weliswaar nie té straf of té lig nie — en dat boere as voogde van die grond deel van die prentjie moet wees. Soos Odette en haar span…