Tuis May - June 2021
Tuis is ’n praktiese, inspirerende gids vir die huis en tuin wat lesers in staat stel om hulle blyplekke mooi te maak, en die waarde daarvan te laat toeneem – binne én buite. Die tydskrif maak die lewe makliker vir mense wat ’n huis wil koop, bou of opknap, of lus is vir tuinmaak, kosmaak of mooimaak. Tuis wys nie net mooi goed nie – ons verduidelik ook wat waarde sal toevoeg tot jou eiendom, en hoekom. Die tydskrif bied bekostigbare en toeganklike keuses aan lesers, hulp met selfdoenprojekte, en raad vir opknapwerk. Dis vir gewone mense – mans én vroue – met gewone lewens, gewone loopbane en gewone huise; mense wat graag hulle eiendomme wil verbeter, en dit moet doen op ’n begroting.
in this issue
liewe leser
Ek lag nou eendag lekker in my mou toe iemand heel onskuldig op ’n Facebook-groep vra wat mens kan gebruik om ’n swart leerbank in ’n ligbruin leerbank te verander. Nee, sy soek nie ’n “slip cover” nie, sy hou van die leer. Net nie die kleur nie. My vingertjies het natuurlik gejeuk om te tik: Jy kort ’n ligbruin koei (met ’n hartkwaal), maar ek het my natuurlik ingehou want, jy weet, nie almal se sin vir humor is goed ontwikkel nie. Hoe dit ook al sy, kort voor lank was daar natuurlik ’n paar spitsvondige antwoorde, waarvan “Magic! You need magic!” my laat proes het. Soms is “magic” inderdaad die enigste oplossing, al moet jy dan jou eie “magic” skep. Dis mos waarvoor Tuis-lesers bekend is, en soos ek al telkemale…
ons lesers sê
WENBRIEF Nuwe hoop Annerie Martins van Mooinooi in Noordwes skryf Soos vir talle ander was 2020 vir my ’n besonderse jaar. Terwyl Covid-19 elke aspek van ons menswees kom indring, word kolorektale kanker in Junie by my gediagnoseer. Sommer gou is my eerste van agt chemoterapiesessies beplan. In my kop was ek slaggereed vir die behandeling en my enigste kommer: Hoe kry ek die drie of meer uur verby sonder iemand wat mag saamgaan? Vasberade om die beste van die saak te maak, gryp ek ’n groot handsak vir water, ’n eetdingetjie of twee en natuurlik ’n masker – en die nuutste Tuis. Met elke sessie maak ek my Tuis-tydskrif oop, propvol nuwe inspirerende idees en artikels. Dit bied ’n lekker aanknopingspunt vir geselsies met ander pasiënte en personeel, en die lang…
wat’s nuut
SKEP EN VERNUWE! WIE Adelai Alberts WAAR Mosselbaai BESIGHEID Ad & Co HAAR WERK Op soek na ’n nuwe kreatiewe uitlaatklep het die argitek Adelai Alberts sowat twee jaar gelede meubels begin opknap. Sy wou hê elke stuk moet uniek wees, maar kon nie altyd die perfekte stoffeermateriaal kry nie. In 2020 het sy en haar ma, die kunstenaar Mari Vermeulen-Breedt, begin saamwerk deur van haar olieskilderye op lap te laat druk – en so het die Ad & Co-materiaalreeks sy beslag gekry! “Ek hou van my ma se klassieke benadering en haar styl pas pragtig by ouer meubels. Elke kunswerk vertel ’n storie,” sê Adelai. Die reeks sluit deesdae tafeldoeke, servette en strooikussings in. Loer daarna by adandco.online. Kyk net dié nuwe kleure van Tjhoko Paint! Besoek tjhokopaint.co.za. Laat spat! Kry die spatpaneel van jou drome met pasgemaakte…
maak dit jou eie
Jan Tuisbly se kaggeltjie Die visuele kunstenaar Liza Grobler en haar man, die skilder en beeldhouer Norman O’Flynn, se huis in Soutrivier, Kaapstad, is vol kuns en kleur. Toe hulle tydens 2020 se winter van die huis af moes werk weens die Covid-19-inperking, het hulle dadelik ’n kaggel laat insit. Die Kratki-kaggel is afgerond met vrolike blou teëls, en een parmantige rooi teëltjie as speelse aksent wat ook ander rooi elemente in die vertrek optel. Liza was bly toe sy die vryvormgranietblad waarop die kaggel staan, raakloop. “Hier is baie organiese elemente in die huis en ek het geweet dit sal mooi lyk hier,” vertel sy. Sien Liza se hele huis in Tuis Verf Dit 2021 (nou te koop). Teëls van Pudlo; granietblad van WOMAG Tekentyd Die verfkenner en interieurontwerper Sharon O’Callaghan Marais het dadelik…
waar toeka en nou saamvloei
Ons leef die hele huis vol en soms gaan sit ek sommer net in ’n vertrek waar dit vir my mooi is. En die dinge wat vir my mooi is, laat my veilig en gelukkig voel. – Anneke WIE WOON HIER? Anneke en Hannes van Rooyen en hulle Duitse herdershond, Kate WAAR Montagu in die Klein-Karoo GROOTTE 320 m² op ’n erf van 1 250 m² Nes ’n mens begin uitkyk vir Anneke en Hannes van Rooyen se huis in ’n boomryke straat op Montagu, spring die syfer 5 groot, grafies en modern teen die wit grensmuur uit. Die sjarmante voordeur met sy loodglasdetail sien jy eers later raak, want dié staan wyd oop sodat jy gang-af tot doer in die agtertuin kyk. En dan draf Kate, die Van Rooyens se Duitse herdershond, stertswaaiend…
’n landelike juweel
DIE HUISEIENAAR Charlotte Collins WAAR Greyton, Overberg GROOTTE 165 m² Dié lieflike huisie op die bekoorlike Overbergse dorp Greyton is die toonbeeld van ingeleefde sofistikasie. Dis die perfekte kombinasie van versamelde meubels en dekorvondste van ouds, terwyl vernuftige opknappings en aanbouings naatloos inskakel by die huis se oorspronklike karakter. Die eienaar – gesoute opknapper en binneontwerper Charlotte Collins – het hier ’n idilliese wegbreekplek geskep waar ’n kaggelvuur ná lang wandelings in die vars lug deel is van die alledaagse leefwyse. “Die eerste keer dat ek op Greyton oorgebly het, was toe ek ’n vriendin gaan help het met die mooimaak van haar huis,” vertel Charlotte. “Die vriendin, ’n oordragprokureur, het my oortuig dis ’n goeie kopie om reg te ruk en gou weer te verkoop. Maar toe die projek op dreef was en ek meer tyd…
