MHLELI: SITHE ngenkathi sihlatshwa sibibithekiswa yisikhali sobandlululo lwethu thina abampisholo kuleli lenkaba yethu, sididekile, sihlukunyezwa ngababusi bangaleyo minyaka. Sinemihuzuko, izibazi, amanxeba, selishabalele ithemba. Kulowo munyu - kusinda kwehlela - kwaqhamuka izinsizwa ezafika zagadla ngengandile induku, ucothoza.
Sekuphenywa kubuzwa ukuthi zingobani, zingesasiphi isigodi, isifunda kwelikaMthaniya, ziholwa ngubani? Zavele zageleza imibuzo kuhle kwemifula yaKwaZulu, iMfolozi, iNgcongcosi, noMsunduzi.
Habe! NgezaseMnambithi lezi ngwazi zengoma, ziholwa okaDonga likaMavuso. USidwaba siLuthuli! Lethiwa ngelithi phecelezi Laysmith Black Mambazo.
Ngunyaka ka-1969, liqanjiwe iqembu, lashisa izikhotha, laphuma langena ezindaweni ezehlukene kwelakithi. Kuleli qembu kukhona nensizwa ebe yinsika. Yadedela izilokotho ezinhle, induduzo, intokozo, ngephimbo, yamukela namathwasa eqembu, yabancelisa ulwazi olunzulu ngemvelaphi yaMambazo aMnyama!
Ngubani le nsizwa? Ingu-Albert Mazibuko! Iqhawe lengoma lilele unomphelo. Sigiya sibonga igalelo lamaphimbo agudle anqamula amawa izintaba nemifula, efafaza ivangeli lothando noxolo.
Yize bengakwazanga ekhaya bempintshekile kakhulu,…